• November 18th, 2019

Mukunupi wakwamusebezi ubonahala mwakhuta yepahami


WINDOKO – Yanali mubeleki mwakatengo ka Global Fund ili yanyazwa kamulatu wakukunupa folomani wahae nikuholofaza yana beleka niyena nabonahalile fapila muatuli Christi Liebenberg viki yefelile. Simataa Merlvin Simasiku walilimo ze 34, nabulelezi muatuli Liebenberg kuli usalibelezi kufiwa muyemeli wa muuso.

Naize nakupile muyemeli kono katengo kabayemeli nekalatuzi kuli neka amuhezi kupo yahae. Muatuli kiha laela Simasiku kuli akupe muyemeli hape mi taba neisizwe la 19 Muimunene. Mwakweli ya Sope unumwaha Simasiku nakile ayokena mwaliofesi zakatengo ka Global fund kwamakopanelo alipisinisi mwamuleneñi mi ayokunupa malumo aketalizoho mi leliñwi laona neli bulaile muzamaisi wahae Sarah Lungowe Mwilima, mi leliñwi neliholofalize yana beleka niyena Ester Ndahelekwa Nepolo. Mwakuikupela kuzekela taba yahae kwande Simasiku naize kezo yeo ne ezahezi kakuli naitwanela, kono nasika toloka hande mi naize “niti ika patululwa muzeko hauka ungeka.” 

Simasiku utalimana nimulatu wakubulaya, mulatu wakubata kubulaya, kapa kukunupa tobolo kusina tokomelo, nikukunupa tobolo mwahala sicaba. Bupaki busupeza kuli naile kwasibaka samusebezi fabulilo bwapili ashimbile tobolo ni malumo asupile. Kuzwafo akambamela kwabulilo bobulobapeli ili teñi Mwilima ni Nepolo nebana niliofesi, mi ayokunupa Mwilima halalu kapa hane mwasifuba, mulala nikwalizoho ili kalulo yene tisize lifu lahae. Azwelapili kukunupa Nepolo mwamulala mi aikela, ayonga mwana hae kwasikolo nikumuisa kwandu, kubaleha bupaki. Kubulelwa hape kuli Simasiku nakile akwaeza kuliba kwasiteshini sa mapokola kuyo ipiha, nikuyo tambeka tobolo yahae niliñolo lateñi nimalumo amabeli. Bazekisi bamuuso babulela kuli Simasiku nasina libaka sakata lakukunupa mwasicaba. Simasiku usiyala mwasitokisi kasamulaho muatuli yomunyinyani Vanessa Stanely nakile amuhanela kuzekela taba yahae kwande.
 


Roland Routh
2019-08-19 07:52:29 | 2 months ago

Be the first to post a comment...

You might also like...