WINDOKO – Bayahi banaha Namibia bazwelapili kuba falimu amukoloko wabatu babasebelisa likwai zehanisizwe, mi bayahi babafitelela myanda yemine, nebatamilwe kuzwa kweli ya Yenda mwasilimo sa 2017. Linombolo kuzwelela kwasipokola sanaha, libonisa kuli babanyazwa ba 572 neba tamilwe mi ba 455 neli bayahi banaha Namibia mwahala kweli ya Yenda ni Ñulule. Linombolo zacwale zene lizibahalizwe kimubakweli kuyomuhulu wasipokola Edwin Kanguatjivi, libonisa kuli bayahi banaha Namibia ba 86 nibanaha Angola babalalu nebatamilwe mwakweli ya Lyatamani kabaka lakuswalelwa likwai zehanisizwe. Linombolo libonisa kuli bane batamilwe nebafumanwi nilikwai zefitelela bolule bababeli. Kuekeza fo, matokwani asiala kuba kwai yehanisizwe yelekiswa hahulu.
Mwakweli ya Sope mapokola mwa Rundu nebasweli lifosi zepeli, kasamulaho wakufumanwa ni matokwani abuima bwa 104kg, amali abatofita falule ni licika (N$1.4 million). Ku akalezwa kuli muyahi wanaha Angola natisize mushimbo kuyozwa mwanaha Angola. Kuekeza fo mapokola banaha Namibia nebatamile muyahi wanaha South Africa, kwa Keetmanshoop mwakweli ya Lungu 2018, kasamulaho akufumaniwa alongile matokwani abuima bwa 244kg, amali alumelwa kufita fabolule bababeli ni licika (N$2.4 million). Ñohola feela mapokola nebasweli matokwani abuima bobufita fa 480 481kg, amali akuma fabolule babane kaba lobapeli (N$4.8 million) mwanaha kaufela. Kanguatjivi naize likwai zehanisizwe litisa sinyeho kwasicaba mi limembala zasicaba liswanela kubihela mapokola babali bukaufi kuamana nibalekisi balikwai zehanisizwe. Kuzwa Yenda 2018 kutaha Lyatamani teko yalikwai zehanisizwe yene fumanwi, ifitelela bolule balishumi kababane (14.4 million).