ONGWEDIVA – Mualafi yabona zakubukeleza makete Nelson Andimba uelelize bayahi banaha Namibia kuambuka kuca nama yakulube yesika buzwa, kakuli ikona kutisa butata. Mualafi yafumaneha mwatolopo ya Ongwediva nabulezi kuli kuca nama yesika buzwa kukona kutisa mabuku mwamubili. “Likulube halica lika zemasila mwamezi amasila kapa mwasilalanda, litisa litombo,mi  litombo zeo likena mwa misinga yalikulube, kacwalo litombo zeo haliciwa lisika buzwa likona kutisa mabuku,” Andimba.

Natolokile hape kuli likulube kamita lishimba litombo mwamubili mi batu bafumana litombo zeo kakuca nama yakulube, mi likena mwamubili nikueza mabuku. “Hañata nama yakulube ina ni mabuku, mutu ukona kubona lika zebonahala busweu mwanama yakulube. Mabuku ao hahula mwamubili wamutu akala kuata mwamala,” nekutolokile Andimba. “Hakutaha kwalisupo mutu ukona kuikutwa kusaba ni maata bakeñisa kuli mabuku ainela kuanya minuno mwamubili, apila kakuli afumana lico kumina. Muikutwa kukatala kakuli hakuna maata, mubili wamina uikabela minuno ni mabuku. Muikutwa kutinguluka kakuli kusilafaza booko bwa mina mi kukona kutisa kuli musike mwabona hande,” nekutolokile mualafi.

Nafile hape kelezo hala kuca nama ifi kamba ifi yesika buzwa. “Nama yesika buzwa ikona kushimba maikulukuwawa mi ikona kumikulisa mwamba. Hape haina makete sakata kakuli ikona kukena mabuku haiba haisika bulukwa hande. New Era neikopanyize ni Amen Ames, yana canga nama yesika buzwa hande. Uhupula busihu bobuñwi hautwa sika sesi zamaya zamaya mwahala mautu hane asweli kubuha wayalesi yamaswaniso. Naize haya mwalitapelo kuyo tatuba abona mabuku fakanekunda kahae.

“Nakenelwa kisabo kakuli pili kusika taha zeo, neni ikutwa kukula kacwalo nese ni ikalezwi mi naya kwasipatela lizazi leli tatami, nikuyo basupeza siswaniso sazene nifumani fakanekunda. Ñaka wasipatela sanibuza kaba neninze ni ca nama yakulube, anitaluseza kuli nenina ni mabuku mwamubili bakeñisa kuca nama yakulube yesika buzwa,” Ames nakandekile. Naize pili asika bona kale mabuku nahakanyeha kuya kwasipatela. “Neni hupula kuli mwendi nikashwa kakuli mabuku ao akona kuhula kuba amatelele nikukala kuca booko kapa sibiti. Fa hanisaca nama yakulube konji hani ikapehela yona,” nekubulezi Ames.