Ehangano lovanhu a va vena oulema woshipa ledina Namibia Albino Association oleli pyakidila nokuyandja omambale omutenya, omakenda okundjala komesho, nomaadi okuvava kohanhu ve na oshipa shitoka moshilongo. 

Meenghundafana a ninga naKundana omupresidende wehangano Joseph Ndinomupya okwa hokolola ta ti ehangano eli lovanhu a va vena oulema woshipa oli na elalakano nokukwashipaleka kutya ovanhu aveshe vena oulema woshipa ovamona oikwafifo ngaashi omakenda omhesho, omaadi okukelela oshipa shavo shihapye omutenya, oshoyo omambale okundjala komutwe omutenya.

Ndinomupya okwa ti ehangano eli oleli hanena oshilongo ashishe moitukulwa yayooloka opo li yandje oikwafifo kovanhu aveshe vena oulema woshipa. “Ovanhu vena oulema woshipa ovapumbwa okukala va pewa oikwafifo unene tuu omaadi okuvava opo va hakwatwe komukifi wokaangela shaashi oshipa shavo ina shifa oipa yovanhu vakwao. Onghee otashi vakwafele neenghono ngeenge vena omaadi okuvava, omakende nosho tuu,” Ndinomupya ta ti.

Mopaife ngaha moNamibia omuna ovanhu vena oulema woshipa tava tengenekwa ve fike pe1800.

Ehangano eli ola totwa momudo 1996 nelalakano lokukwafela ovanhu vena oulema woshipa moshilongo. Ndinomupya okwa denga omufindo ta ti ehangano lavo ola taalela eshongo lakula lomaadi okuvava ovanhu a va vena oulema woshipa.

“Mopaife ngaha mehangano letu ka tuna mo vali omaadi a wanena ovanhu aveshe vena oulema woshipa, onghee oshili eshongo lakula shaashi nokoipangelo yepangelo nako omaadi okwa pwa ko paife,” Ndinomupya ta ti.

Onghee otai indile oshiwana opo shi yambidide ehangano lavo nokuyandja omaadi okuvava kovanhu a va vena oulema woshipa.

Okwa ti oshiwana nashikwatafane nombelewa yavo ili mOshakati una ngeenge sha hala okuyambidida ovanhu a va.

“Natukaleni tu hole ovanhu vena oulema woshipa, navo ovanhu ashike ngaashi ovanhu vakwao,” Ndinomupya ta ti.