Ehangano loNampower ola waimina Elelo lopashitukulwa laMusati moshikonga shokuhonga ovanafikola nghee ve na okutauluka eepate.

Meenghundafana a ninga naKundana omunashipundi melelo loshitukulwa shaMusati Andreas Shintama okwa ti elalakano loku ninga oshikonga eshi oku longa ovanafikola moshitopolwa shaMusati nghee ve na okukala tava tauluka eepate unene tuu ounona ava vashona ve li komikunda. 

Shintama okwa ti ovanafikola veendodo dopedu ovo ve li unene oihakanwa yokulyatwa komahauto.

Omafiku eshi a li 18 a maalisa omunafikola wopofikola Otjaandjamwenyo combine school weedula 12 e li mondodo onhinhatu okwa xulifa eshi a lyatwa kotuwa kwa li ta tauluka opate.

Eefikola ngaashi Omundhuwahauwanga Primary School noShoopala Combined School keshe imwe oya kanifa omunafikola a fya eshi a lyatwa kotuwa, omanga tava tauluka opate.

Naashi osha pa Nampower nOmusati Regional Council edilaadilo opo vaufane ovadali vounona, ovalongifikola, elelo lofikola Otjaandjamwenyo novanafikola opo va ngudumane pofikola Otjaandjamwenyo va shiive va pewe ouyelele wa fimana.

“Ohandi kunghulile ovanafikola unene tuu ava ve li meendodo dopedu opo ova kale ve na oupafi ngeenge tava tauluka opate,” Shintama ta kumaida ovanafikola.

Omunambelewawiliki Moses Hanga a dja koNampower okwa ti ounona ova fimana moshiwana, onghee oshi li oshinakuwanifa shakeshe omudali opo a kale ta longo okaana keumbo ngheene ke na okutauluka opate.

“Ounona ovo ovaleli vokomongula, tava ka ninga ovanashilonga va yooloka, ondi udite shiwa ngeenge eemwenyo dounona vetu oda amenwa ngeenge tashi ya pokutauluka opate,” Hanga ta ti.

Pexulilo Shintama okwa twa ovanafikola omukumo opo ve lihonge noudiinini, yee ta yelifa kutya oshikonga eshi otashi twikile keefikola dihapu moshitukulwa shaMusati.