New Era Newspaper

New Era Epaper
Icon Collap
...
Home / NCCI a yandja eembete koshipangelo shaShakati

NCCI a yandja eembete koshipangelo shaShakati

2021-08-27  Festus Hamalwa

NCCI a yandja eembete koshipangelo shaShakati

Festus Hamalwa

Ehangano loNamibia Chamber of Commerce and Industry (NCCI) ola yandja eembete di li 40 koshipangelo shaShakati opo di kale tadi longifwa kovanhu ve na ombuto yoCovid-19. Ehangano lo-NCCI ola kala nokukwafela ouministeli wouhaku nokukwashipaleka kutya moipangelo omu na eembete da wana okutula ovanaudu ve li kepango lombuto yoCovid-19.

Moshipopiwa shaye minista wouhaku nonghalonawa Dr Kalumbi Shangula okwa tambula ko eembete nolupandu linene. Kalumbi okwa popya ta ti ouministeli wouhaku owa kala u na omhumbwe yeembete inadi wana peemwedi Juli naJuni shaashi efimbo olo omwaalu wovanhu tava kwatwa kombuto yoCovid-19 owa kala u li pombada.

“Ehangano lo-NCCI pamwe nomahangano ngaashi De Beers Group, CMB, Hangala Group, nomina yo-B2 Gold okwa kala taa kwafele oministeli youhaku mokukondjifa ombuto yoCovid-19, onghee mopaife ngaha omandiki ouhaku amwe oku na eembete da wana eshi twa pewa omakwafo komahangano aa,” Shangula  ta ti.

Shangula okwa popya ta ti onghalo yoCovid-19 otai ende ya uka kouwa paife onghee okwa pandula ovanailonga voundjolowele eshi va kala tava longo nondjungu nelitulemo pefimbo va kala tava yakula ovanaudu komandiki ouhaku.

Okwa ti ovanailonga voundjolowele ve li 21 ova fya kombuto yoCovid-19, onghee okwa kunghulila ovanailonga vouhaku opo va twikile nokukala tava longo noudiinini.

“Ombuto yoCovid-19 ohai tandavele okudja kovanhu, onghee twa pumbwa opo tu kale hatu liufa komilandu doCovid-19 opo ashike tu shunife etandavelo lombuto pedu,” Shangula ta ti.

Minista okwa twa omukumo oshiwana shomoshitukulwa shaShana opo shi ka tunhilwe ombuto ei, shaashi okwa didilikwa oshitukulwa shaShana osho shi na omwaalu u li pedu wovanhu va tunhilwa.

Okwa popya yoo ta ti ovanhu nava xulife po okukala tava yandjaneke ouyelele wa puka kombinga yovenda yoCovid-19 shaashi eshi otashi kufa ovanhu omukumo woku ka vendwa.

Moshipopiwa shaye omukulunhu wehangano lo-NCCI Bisey /Uirab okwa popya ta ti ehangano lavo otali lalakanene opo ombuto yoCovid-19 i kale ya xulifwa po moshilongo ngaashi naana koilongo ikwao kuhe na vali ombuto. 

/Uirab okwa ti ehangano eli otali twikile nokukala tali longele kumwe nouministeli wouhaku opo va dule okulwifa ombuto.

Omukulunhu wouhaku moshitukulwa shaShana Johanna Haimene okwa pandula ehangano lo-NCCI nomahangano akwao eshi a yambidida oshipangelo shaShakati, onghee okwa ti paife oshipangelo shaShakati oshi na onhele yakula yokukala tai tulwa ovanhu tava kwatwa kombuto yoCovid-19.


2021-08-27  Festus Hamalwa

Share on social media