Festus Hamalwa
Oshikondo shevyulonghalo netonatelo leedolongo (NCS) moNamibia osha yambididda ouministeli wehongo eshi ya tungifa eengulu dofikola dili mbali odo da pewa eefikola mbali domoshitukulwa shaKhomas.
Eefikola edi da pewa eengulufikola odo Gammams Primary school, MH Greeff Primary School, omo ofikola keshe ya tungilwa eengulu mbali dili pongushu yoshimaliwa N$800 000. Omukulunhu woshikondo shomavyulonghalo needolongo moNamibia Commissioner General Rapheal Hamunyela okwa ti ehongo olo limwe la fimana moshilongo onghee naashi osha eta opo oshikondo shomavyulonghalo shi kale sha yambidida ouministeli wehongo mokutunga eengulufikola dili nhee keefikola mbali.
“Otwa hala oku kwashipaleka kutya ounona vetu otava longelwa meengulufikola diwa nodili pamufika woshinanena opo ovanafikola va kale vena omukomo wokulihonga. Ngeenge ofikola oina eengulufikola da wana nena eshi otashi yandje omito kovanafikola vahapu opo va kale va mona omhito yo kuya keetundi shaashi mofikola omuna eenhele da wana,” Hamunyela ta ti.
Hamunyela okwa kungulila ovanafikola opo va tonatele eengulu edi nokukwashipaleka kutya ota di kala dayela nawa nokukele oku teya mo omakende nomivelo.
Hamunyela okwa ti oshikondo shavo oshi li shelipyakidila okukala sha tunga natango eefikola dimwepo dili hamhano, odo nado dadidilikwa dina omhumbwe yeengulufikola.
Okwa popya ta ti oshikondo shomavyulonghalo otashi twikile okukala tashi longele kumwe noumisteli wehongo opo va dule okukala tava yambidida eefikola moshilongo.
Moshipopiwa shaye omupedu minista wehongo lopedu Faustina Caley okwa tambula ko eengulufikola edi nolupadu linene. Okwa popya ta ti eengulu edi ode u ya pefimbo liwa shaashi ouministeli wehongo owa kala una omhumbwe yeengulufikola ina diwanena ovanafikola.
Caley okwa ti ehongo olo oshipatululo sheenghalamwenyo dounona, onghee okwa ti osha fimana ngeenge oshiwana osha longwa shaashi ovanafikola ovo tava ka ninga ovashilonga vayooloka vokomongula. Okwa twa ovanafikola novahongi omukumo opo longe nondjungu nelitulomo moilonga yavo yofikola.
Caption: Omupedu minista wehongo Faustina Caley ta tambula ko eengulufikola edi da tungwa koshikondo shomavyulonghalo