New Era Newspaper

New Era Epaper
Icon Collap
...
Home / Ofikola Imbili ya tamekwa kutungululwa

Ofikola Imbili ya tamekwa kutungululwa

2023-02-09  Festus Hamalwa

Ofikola Imbili ya tamekwa kutungululwa

Omukulunhuwiliki wehongo moshitukulwa shaHangwena Isak Hamatwi okwa ti eengulufikola odo kwa li da pwepwa po komhepo kofikola Imbili Combined School onda tamekwa okulongwa notadi kala da pwa moshivike omu.

Okwa ti ovanafikola otava tameke okulongelwa meengulufikola oshivike tashi ya.

Hamatwi ta yelifa kutya eengulufikola odo otadi longwa oshali kovanyasha tave liyambe va dja kehango loAssociation for Unemployed Artisans Namibia. 

Okwa ti ehango ola kala nokuyambidida eefikola dihapu mOhangwena eshi la kala nokulongulula omatungo eefikola dihapu.

Ovanafikola koImbili Combined School ve li meendodo dopetameko okudja ondodo yotete fiyo onhinhatu ohava kala ashike ve li pondje tava danauka fimbo vakwao tava longwa shaashi pofikola kape na eengulu da wana okudja eshi omatungo a pepwa po komhepo omudo wa dja ko muNovomba.

Etungo e li la pepwa ko komhepo okwa li li na yoo vali ondodo onhi-9, ombelewa noshoyo onduda yokupungula onghee paife ovanafikola ve li mondodo onhi-9 ohava longelwa motenda. 

Vati ngeenge odula tai loko motenda omo ha mu longelwa ovanafikola ohamu talama omeva, yo ohai hale vali okupepwa po.

Pefimbo lomutenya motenda ohamu kala mwa pupyala onghee eshi ohashi piyaaneke ovanafikola vehe litule mo ngeenge omuhongifikola ta longo.

Eendodo ngaashi onhi-5 fiyo onhi-8 ohadi longelwa meengulufikola doubashu ashike navo ohava talama omeva ngeenge odula tai loko. 

Omukulunhu wehangano loAssociation for Unemployement Artisans Namibia Florian Mwetulundila okwa ti ehangano lavo otali lalakanene okushakeneka epangelo ondjilakati tashi pitile mokulongulula eefikola odo di na omhumbwe yeengufikola da kulupa.

Okwa ti elalakano lehangano eli okuyandja eemhito doilonga kovanyasha va dja koiputudilo ya yooloka vehe na oilonga.

fhamalwa@nepc.com.na


2023-02-09  Festus Hamalwa

Share on social media