New Era Newspaper

New Era Epaper
Icon Collap
...
Home / Oibofa konyala 100 yomakwatonghonga ya lopotwa mOhangwena neudo

Oibofa konyala 100 yomakwatonghonga ya lopotwa mOhangwena neudo

2022-07-15  Festus Hamalwa

Oibofa konyala 100 yomakwatonghonga ya lopotwa mOhangwena neudo

Omukonakoni woimbuluma wopolifi moshitukulwa shaHangwena Omupedukomufala Zacharia Amakali okwa ti neudo mOhangwena omwa lopotwa oibofa ihapu i li 92 yovanhu va kwatwa onghonga.

Amakali okwa ti ekwatonghonga olo limwe la didilikwa li li oshimbuluma tashi dana onghandangala mOhangwena eshi ovakainhu, ounona voukadona nounona voumati va ninga oihakanwa yokukwatwa onghonga kovapambele vavo nosho tuu.

Okwa ti opolifi oya didilika ovanyeumbo ve hole okuya mekwatafano lopaihole nounona ve li koshi yeedula 16 eshi hava kala tave va hekele oimaliwa.

Okwa ti moibofa omwa kwa telwa ounona voumati nounona voukadona va longelwa ominyonena dopaixulo eshi va kwatwa onghonga kovapambele vavo.

Eenhana odo dimwe di li pombada yoibofa 26 yomakwatwonghonga taku landula Okongo i na oibofa 19.

Omwedi Maalisa omwa lopotwa oibofa i li pombada 21 taku landula Apiilili 20 omanga Febuluali oku li pedu noibofa 8.

Ovafekelwa 70 ova kwatwa po neudo eshi va kwata ovanhu onghonga omanga vamwe inava kwatwa po konima eshi va faduka po, ile ngeenge pehe na omauyelele ina e lixwa po. 

Okwa lombwela Kundana ta ti opolifi oya taalela eshongo linene loibofa yomakwatonghonga hai lopotwa kwa laata omanga imwe ohai holekwa eshi oshiwana hashi kala inashi hala okuyandja ouyelele kopolifi.

“Ovanhu vamwe ove hole okuteya po oibofa yomakwatonghonga unene tuu ngeenge omunhu a kwatwa onghonga kofamili. Ohava ka kundafana opo oshibofa shi teke po shaashi vati ovanhu ova pambambafana,” Amakali ta ti.

Amakali okwa hokolola ta ti oibofa ihapu yomakwatonghonga ohai ningwa kovanhu ve li koshi yomalodu eshi hava kala ve na omahalo oipala uuna ve li denga mo.

Okwa ti ounona vamwe ihava kala ve li mefiloshisho la wana lovadali vavo eshi shi li sha nyika oshiponga ngeenge okaana ka fiwa oko akeke meumbo. 

Onghee okwa kunghilila ovadali opo va kale tava tonatele ounona wavo ile va fiye ounona poushiinda ngeenge tava di po.

“Okuhe na eudeko nako ohaku eta ovanhu opo va hekwe va teye po oshibofa shekwatonghonga eshi hava kala tava hekwa,” Amakali ta ti.

Okwa weda po ta ti oshiwana nashi kale tashi lopotele opolifi oibofa yomakwatonghonga pefimbo shaashi eshi ohashi kwafele opolifi opo i kale ya ninga omakonakono noupu.

fhamalwa@nepc.com.na


2022-07-15  Festus Hamalwa

Share on social media