Modoolopa yaRehoboth omwa lopotwa oibofa ine yovanhu va hangika noingangamifi meetuwa davo mefiku limwe.
Omupopiliko wopolifi moshitukwa shaHardap Inspector Linea Heita okwa koleka ta ti oshitukulwa Hardap osho shimwe sha lopotwa shi na oibofa ihapu yovanhu hava kwatwa nomapangwe. Oibofa ya lopotwa neudo aishe kumwe oi li 12.
Okwa hokolola ta ti elongifo loingangamifi ola hanya moshitukulwa shavo unene moMarientala noshoyo Rehoboth.
Okwa ti ovanhu vamwe ohava kwatwa tava landifa omapangwe noingangamifi ikwao, vamwe ohava nwine momaumbo omanga vamwe hava kwatwa nao meetuwa davo.
Movafekelwa va kwatwa lwaxuuninwa, omwa kwatelwa ovakainhu vavali va hangika vati nomapangwe meetuwa. Ovakainhu ava, umwe oku na omido 35 naumwe oku na omido 32. Ovalumenhu ova kwatela mo omunamido 38 nokamatyona komido 17.
Oingangamifi oyo ya hangika kovafekelwa oi li pamaludi a yooloka nghaashi epangwe, eepela doMandrax, kumwe oi li pongushu yoN$5 360 ayeshe kumwe.
Heita okwa weda po ta ti ovanafikola vamwe na vo ohava landifa omapangwe konima yeetundi eshi hava kala tava landifile komalukanda.
“Ovanhu paife ohava kala tave li dipayafana konima ngeenge va nwa omapangwe shaashi epangwe oha li piyaneke ouluvi womunhu opo a kale a kwatwa komhepo yokulonga oimbuluma,” Heita ta ti.
Okwa ti opolifi moshitukulwa shavo oya kala nokuninga oikonga meefikola tai yandje ouyelele kombinga nghee sha nyika oshiponga ngeenge ovanafikola tava longifa omapangwe.
Okwa kumaida ovadali opo va kale tava popi nounona vavo va xulife po okulongifa oingangamwifi.
“Oshiwana na shi kale tashi lopotele opolifi ngeenge shi wete omunhu ta landifa omapangwe ile ta longifa omapangwe,” ta ti.