Festus Hamalwa
Okamatyona keedula 18 oka kwatwa po eshi vati ka teya obashu yamukainhu nelalakano lokumukwata onghonga.
Vati okamatyona konima eshi ka teya obashu oka longela omukainhu oilonga yominyonena dopaixulo eshi ke mu kwata onghonga. Oshiningwanima eshi osha ningilwa kolukanda Kamanjab moshitukulwa shaKunene Omaandaxa efimbo lokeengulasha.
Omukonakoni woimbuluma wopolifi moshitukulwa shaKunene omupeduCommissioner Paavo Iiyambo okwa hokolola ta ti mufekelwa okwa kala shito nokukondjifa nakuninga oshihakanwa opo vaye naye moixulo ashike omukainhou ou kwa kala noku shi anya.
Vati manga nakuninga oshihakanwa a kofa okwa ponokelwa komufekelwa eshi e uya pobashu yaye ndele ta teya po omuvelo. Nokonima vati eshi omufekelwa a pondola okuteya po omuvelo okwa ya mobashu ndele ta tameke okudula omukainhu oikutu fiyo tai naye moixulo.
Okudja opo omukainhu okwa ka mona ashike nale a kwatwa onghonga nokonima okwa faduka po opo aka lopotele opolifi.
Nakuninga oshihakanwa ou vati a kwatwa onghonga oku na omido 20.
Omufekelwa okwa kwatwa po efiku tuu olo a longa oshimbuluma shaashi ovakwashiwana ova kala nale ve shi kutya ohadi peni. Omufekelwa okwa nyenwa oboolofa yokuli futile mo modolongo konima eshi a holoka momhangu kOutjo.
Lopokati opo, omulumenhu weedula 31 naye okwa twa po mexuliloshivike eshi vati a kwata omukainhu weedula 40 onghonga modoolopa yaPuwo efimbo lokonguloshi.
Opolifi oya hokolola tai ti omufekelwa okwa kengelela nakuninga oshihakanwa eshi e mu ufana keumbo lavo nelalakano vati lokumukwata onghonga. Omufekelwa okwa nyenwa oboolofa konima eshi a holoka momhangu yaPuwo nota pangulilwa oshibofa shekwatonghonga.
Omakonakono opolifi otaa twikile moibofa aishe yomakwatonghonga.