Ovadali momukunda Oluundje momudingonoko shaKankolo itava ka enda vali eendjila dile okutwala ounona vavo kofikola yoshikunino.

Ovanamukunda ava ova tungilwa eengulu dofikola, da tungwa noshimaliwa sha yandjwa kehangano loSea Food Namibia. Ehangano ola yandja oshimaliwa shoN$600 000, osho sha longifwa okufuta ovanhu va tunge, okutula omeva pofikola noshoyo okutunga oundjuwo vavali nokulanda oikwafifo ya yooloka. KanselawoshikandjohoololoOkankolo Hans Nambondi okwa ti eshongo lokuhe na ofikola yoshikunino olo limwe la kala nokudana onghandangala ya kula momukunda Oluundje.

“Ovadali okwa li hava ende oinano ile tava twalwa ounona vavo kofikola yoshikunino komikunda dokomakule. Ounona vamwe ihava mono omhito yokuya kofikola yoshikunino molwaashi ofikola oi li kokule,” Nambondi ta ti. Eshi osho she mu fininika opo a konge ekwafo kehangano loSea Food Namibia. Nambondi okwa ti otava ka kwatafana yoo nombelewa yaminista wehongo opo ofikola i kale ya shangifwa kepangelo. “Pofikola ohapa longo ovahongifikola vavali hava futwa kovadali nakeshe omudali oha futu N$50 komwedi mokaana keshe,” ta ti.

Mwene womukunda Oluundje noku li omukulunhuwiliki wehongo moshitukulwa shaHangwena Isak Hamatwi okwa ti osha fimana ngeenge ounona tava tameke ofikola pondodo yoshikunino. Onghee okwa kumaida ovadali opo va longife omhito ei okutwala ounona kofikola yoshikunino. “Oshiwana nashi li kaleke kokule nokuvaka po oikwafifo yofikola. Omunhu keshe na kale e na oshinakuwanifa shokulopota ovanhu tava longele omunyonena ofikola ei,” Hamatwi