Omupeduprima Netumbo Nandi-Ndaitwah okwa ti omauliko oipindi okwa fimana okukala taa ningwa meedoolopa shaashi otaa eta oyuuyemo noshoyo eemhito doilonga kavanyasha, neemhito dokulandifa oilongomwa yavo.
Edi Nandi-Ndaitwah okwe di popya kouvalelo wowima wa li wa longekidwa kelelo lodoopa yaNdangwa Olomakaya.
Omupeduprima okwa ti ngeenge taku ningwa omauliko oipindi meedoolopa ohashi yandje omhito koshiwana opo shi landife oilandifomwa yasho ya yooloka nokulipaafana ounongo wongeshefa.
Onghee okwa indila oshiwana opo shi kale tashi yambidida omauliko oipindi shaashi eshi otashi tu ovalandifi omukumo va twikile nokulandifa.
Okwa weda po ta ti omauliko oipindi okwa fimana yoo vali shaashi otaa nane ovanangeshefa va yooloka okudja meni nokondje yoshilonga ve uye okukufa ombinga mokulandifa.
Elelo lodoolopa yaNdangwa ola longekida ouvalelo wowina nelelakano lokuongela oshimaliwa shokulongifa mokulongekida omaulikilo oipindi oo taa ka kala ko momafiku 02 fiyo 06 Mai neudo.
Omauliko oipindi aNdangwa okwa ninga eedula nhatu inaa ningwa molwaashi kwa li ku na omukifi woCovid-19 oo kwa li wa eta omwaalu wengudumano lovanhu u ngabekwe.
Nandi-Ndaitwah ou kwa li oye omupopi wefiku kouvalelo okwa pula omalelo eedoolopa opo a kale taa longifa oshimaliwa osho tava mono okudilila moshiwana, mokuandjaneka omayakulo meedoolopa noshoyo okuyambula po eedoolopa di kale pamufika muwa.
“Onda pandula elelo lodoolopa yaNdangwa eshi la tula moilonga opo li kale la ninga omauliko oipindi neudo. Onghee oshiwana nashi longife omhito ei opo shi kufe ombinga momauliko opaipindi aa,” ta ti.
Nandi-Ndaitwah efiku olo okwa yandja oshimaliwa N$4 000 nongobe kelelo lodoolopa yaNdangwa opo li wede po mokulongekida omauliko.