Omulumenhu womukwashiwana waChina vati okwa vakwa oshimaliwa shoN$120 000 komukainhu e na naye ekwatafano lopaihole nakahewa kaye. Oshiningwanima eshi vati osha ningilwa mohotela yonhumba moWindhoek, mEtivali, efimbo lokeengulasha. 

Nakuninga oshihakanwa okwa lombwela Kundana ta ti oku na ekwatafano lopaihole naumwe womovakainhu ovo. Ta ti okwa li a ifana omukainhu waye oo a li koWalvis Bay opo e uye kuye koWindhoek ashike eshi omukainhu ou e ya okwa enda pamwe nakahewa kaye umwe. Okwa hokolola ta ti manga e li mokandjuwo, ovakainhu vati ova ya mondjato yaye yoimaliwa nokukufa mo oshimaliwa. 

Okwa ti mondjato ya ye, okwa li mu na oshimaliwa N$220 000, ovakainhu ova fiya mo ashike N$100 000 ndele tava faduka po.

“Eshi nda ka dja mokandjuwo onda hanga nale va faduka po. Onda ninga onghendabala yoku va dengela ongodi ashike eengodi davo oda dima,” ta ti. 

Okwa yelifa ta ti ina patulula oshibofa fiyo opapa ashike okwa lopotela ehangano loMonica Gender Equality Human Rights and Social Justice olo hali lwifa omahepeko oukashikekookanhu noshoyo oimbuluma.

“Onda hala ashike oimaliwa yange. Ovakainhu onda hala twa ya navo kopolifi opo va ka popya kutya oshimaliwa shange oshi li peni,” ta ti. Eshi a kwatafana naKundana omukulunhu wehangano loMonica Gender Equality Human Rights and Social Justice Shaanika Nashilongo okwa ti ehangano lavo ole lipyakidila nokukonga ovakainhu ovo onghee otali indile moshiwana kwaau e na ouyelele kombinga yovakainhu ava opo oshiwana shi kale sha lopotela ombelewa yavo 0816500003.

Okwa ti kukeshe ou ta ka yandje ouyelele womondjila ota ka pewa olupandu loN$15 000. Nashilongo okwa weda po ta ti otaku fekelwa kutya ovakainhu ova uka koitukulwa yokonooli.

“Ovalumenhu nava kale va kotoka ngeenge tava eta ovakainhu komaumbo avo. 

Ovalumenhu inava tula vali oimaliwa poluhaela ngeenge ve li novakainhu vehe va shi meenduda,” ta ti.

fhamalwa@nepc.com.na