Omukulupe gwomimvo 85 okwa si, sho a lika kondje momukunda Etoto, moshitopolwa shaMusati.
Omukuluntu gwopolisi moshitopolwa shaMusati Titus Shikongo okwa ti, oshiningwanima shoka osha holoka lwopotundi 14h00 yomutenya, momudhingoloko Epupa.

Otaku hokololwa kutya omukulupe gwomusamane ngoka, okwa li a lika kondje omutenya ngoka, ihe kakwa li a ya koshipangelo.
Shikongo ta ti, aakwanezimo yomukulupe okwa li ya mono uuwehame tawu yi pombanda esiku lya landula.
Ta ti, omukulupe okwa li a sile mondjila okuya koshipangelo. Aakwanezimo ye oya tseyithilwa.
Nakusa okwa tseyika nedhina Kovipene Tjanda.

Moshiningwanima inaashi faathana, opolisi moshitopolwa Omaheke oya manga po aalumentu yatatu mehuliloshiwike, sho ya adhika niingaangamithi yongushu  N$40 000 ayihe kumwe. 

Otaku hokololwa kutya omulumentu gwomimvo 26 okwa mangwa po kopolisi  sho a adhika niingangamithi yongushu N$115 900.
Opolisi tayi ti, omulumentu ngoka okwa li a mangwa sho opolisi ya li ya ningi omboloka mokati kuusiku momudhingoloko gwaGobabis.
Otaku hokololwa kutya omuhingi gwotakisi ngoka a li a zi kOvenduka, okwa li aadhika nooshako  dhina iingangamithi yina odjundo yokilogalama 11.590.

Momudhingoloka gwaGobabis mondoolopa yaAroab, omulumentu gwomimvo 23 okwaadhika niingangamithi yongushu N$1 200 nondjundo yokilogalama 40.

Etitano lya zi ko, omulumentu gwomimvo 33, okwamangwa niingangamithi yongushu N$39 795. Otaku hokololwa kutya, omulumentu ngoka okwa li amangelwa oshinano shithike  pokilometa 700 okuthika moGobabis.