Omukulupe weedula 86 okwa kwatwa onghonga komulumenhu womushiinda shaye meumbo laye moWindhoek.

Opolifi oya hokolola tai ti omukulupe okwa hangika a nangala komufekelwa oo vati a li ta kwena ta ti kutya oku na omukainhu waye wopaihole a fya, a tuwa nombele.

Vati okudja opo omufekelwa okwa ya kombete yomukulupe a nyika oluhodi nokonima yefimbo omufekelwa okwa nukila omukulupe ndele te mu tula oshiwilo koshipala nokuya naye moixulo.

Oshiningwanima shikwao, okaana keedula 10 vati oka kwatwa onghonga kuxe a hombola ina meumbo lavo molukanda Goreangab moWindhoek.

Vati okaana oka kala nokukwatwa onghonga kuxe lwoikando ihapu alushe ngeenge ina a ya koilonga ashike vati oka kala ke na oumbada wokulopota shaashi oka lombwelwa komufekelwa kutya inake shi popya.

Omupopiliko wopolifi moshitukulwa shaKhoma Warrant Silas Shipandeni okwa hokolola ta ti nakuninga oshihakanwa okwa lopotela ina naina okwa lopotela opolifi.

Lwopokati opo, okaana keedula 11 nako vati oka kwatwa onghonga komunafikola mukwao eshi e ka landulila mokandjuwo ndele ta i nako moixulo.

Oshiningwanima eshi osha ningilwe neudo momafiku 09 Sepetemba moWindhoek.

Opolifi oya ti ounona vavali noshoyo omukulupe aveshe ova twalwa koshipangelo opo va ka mone epango lopaunamiti nomayakulo exungomwenyo.

Ka pena omufekelwa a kwatwa po moibofa aishe yekwatonghonga onghee omakonakono opolifi otaa twikile.

Opolifi oya kunghilila oshiwana opo shi kale tashi lopota oibofa yomakwatonghonga pefimbo opo ava va ninga oihakanwa va kale va yambididwa pefimbo.

– fhmalwa@nepc.com.na