New Era Newspaper

New Era Epaper
Icon Collap
...
Home / Omulumenhu a lulilwa eshi a fiilwa okaana keemwedi nhano

Omulumenhu a lulilwa eshi a fiilwa okaana keemwedi nhano

2021-07-02  Festus Hamalwa

Omulumenhu a lulilwa eshi a fiilwa okaana keemwedi nhano

“Onda lulilwa kokaana kange kehe na odjapo yedalo, onda ninga eenghendabala dihapu ndele inandi mona ekwafo. Okaana kange ihaka mono oshimaliwa hashi di kepangelo, onghee ondi li moluhepo shaashi ihandi longo. Paife ngaha eemwedi di li 10 ndi li nokaana kange”.

Aa omatumbulo aReinhold Nuuyoma omukalimo womOshakati, weedula 42 ta hokolola nghee e li moudjuu wokaana kaye kake na odjapo yedalo.

Nuuyoma okwa lulilwa kuina yokaana kaye ou a faduka po omudo wa djako muAguste.

“Fiyo onena kandi shi kutya ina yokaana kange kutya oku li peni, okwa fiya po okaana efimbo ke na eemwedi nhano, mopaife ngaha okaana oke na odula neemwedi nhano. Kandi shi kutya ovakwapata vaina ove li peni shaashi onda ninga eenghendabala dokukonga ina, ashike inandi mu mona fiyo onena. Onda lulilwa unene shaashi onda hala okaana kange ka mona oufemba opo ka kale taka mono omakwafo okudja kepangelo,” Nuuyoma ta hokolola.

Okwa ti oshikumungu eshi shomuholike waye a faduka po okwe shi lopota nokopolifi, yee okwa shiivifila novanambelewa vokouministeli woukashikekookanhu, ndele fiyo opapa kape na eshi sha ningwa po.

“Ondi li meshongo shaashi ame ihandi longo vali, onda kanifa oilonga yomomatungo omo nda li handi longele odula ya dja ko,” Nuyoma ta ti.

Okwa kala nokuya keembelewa doikwameni opo okaana kaye ka mone odjapo yedalo, ashike vati ita kwafelwa shaashi ina yokaana ke po. Okwa ti ina yokaana okwa pumbiwa opo va ye naye keembelewa va ka ninge odjapo yokaana, onghee okwa lulilwa efimbo keshe.

“Ame inandi tanguna naina yokaana kange, otwa kala tu na naye ombili mokabashu aka kwa li ndi li. Ashike komatango efiku limwe okwa kana po. Kandi shi kutya oshike sha enda po pokati ketu shaashi onda ka mona ashike omunhu ta ti kwatele nge okaana manga handii kokandjuwo. Opuwo okudja opo onda ka mona kwa toka ina alukila meumbo. Okudja opo onda shiivifila opolifi, ashike fiyo onena eli kandi shi kutya omuholike wange oku li peni,” Nuuyoma ta hokolola.

Okwa ti okuhole okaana kaye noha fi oshisho kutya oke na oikulya nonande ke na oilonga manga.

“Ohandi indile kOvasamaria ovanamutimanghenda opo va yambidide nge nakashona vena po, kutya nee oikulya, oikutu yokaana ile ominambo shaashi ondi na omhumbwe yoikulya nokaana kange oka pumbwa oikutu,” Nuyoma ta ti.

Nuuyoma okwa ti keshe ou e na ehalo lokumuyambidida okwa manguluka opo a kwatafane nombelewa yangoloneya moshitukulwa shaShana. 

Nuuyoma okwa hokolola ta ti monhele omo kwa li ha hiile i li molukanda laKandjengedi mOshakati okwa dja mo paife shaashi kape na sha oshimaliwa shokufuta.

“Paife ohandi di ponhele i li konima yoYetu mOshakati, onhele yedina Ondapandula omo hamu kala oomeme ve lihumbata ngeenge ve ya okuteelela.  Onhele ei ohai futilwa eedola nhano mefiku keshe. Omo ne paife handi di nokaana kange omo hatu mono oixuna shaashi katu na oikulya. Mafiku amwe okaana kange ohaka pewa oikulya koomeme ava tu li navo monhele omo,” ta ti ngaho.

Nuyoma okwa ti ota ka pandula kukeshe ou te ke mu yambidida.


2021-07-02  Festus Hamalwa

Share on social media