Festus Hamalwa
Omulumenhu weedula 42 okwa fya eshi a pila meumbo laye efimbo lokeengulasha, lwopotundi 05h00 oku pendukila onghela, molukanda Mondesa moSwakopmund.
Nakufya okwa tongolwa oye Fransa Shihenda omukalimo womodooloopa yaSwakopumd. Omupopiliko wopolifi moshitukulwa Erongo Inspector Ileni Shapumba okwa hokolola ta ti kape na ouyelele kombinga yo shi etifi shomundilo.
Okwa hokolola ta ti ovashiinda ova uda ashike ondaka yomulumenhu ou tai ngida naashi vaka tala ko ova mona kuty obashu yaye oya tema omundilo. Eshi ovanhu va kaya pobashu opo ova hanga nale Shihenda a xulifa
Opolifi oya ti efiku olo eebashu dili nhatu da shaama nobashu yaShihenda nado oda pya po. Oshiningwanima shikwao, omulumenhu weedula 25 okwa dengwa nomamanya eshi kwa li vati ta kendabala okutataa ookalyamupombo konima eshi vati va nyeka omukainhu omaliko aye.
Oshiningwanima eshi osha ningilwa moKhomasdal Omaandaxa efimbo lokonguloshi. Opolifi oya hokolola tai ti nakuninga oshikahanwa okwa hanga omukainhu ta kufwa oinima yaye kovafekelwa vovalumenhu onghee okudja opo okwe uya opo a yambididi omukainhu oo.
Okudja opo okwa landula ovafekelwa nokonima ovafekelwa ove mu nukila noku mu denga. Nakuninga oshihakanwa okwa twalwa koshipangelo nota ku hokololwa kutya oku li monghalo i li xwepo paife.
Lopoka ti opo, omunailonga womulumenhu poshitaashi shomahooli shoPuma moWindheok West okwa dengwa kovafekelwa vovalumenhu vane eshi ve mu nukila ndele tave mu nyeka oshimaliwa N$279046 nokufaduka po. Opolifi oya hokolola tai ti nakuninga oshihakanwa okwa li e li motuwa nomunailonga pamwe naye tava twala oimaliwa yongeshefa kombaanga efimbo longula. Vati manga ve li motuwa ovafekelwa ova kufa eendjebo nokuumba mombada loikando ivali nokuninga omatilifo tava pula oshimaliwa onghee okudja opo nakuninga oshihakanwa okwa dengwa nomamanya komutwe.
Ka pena oshimaliwa sha monika onghee omakonakono opolifi otaa twikile.
fhamalwa@nep