New Era Newspaper

New Era Epaper
Icon Collap
...
Home / Omulumenhu a ponokelwa keengangala ndele tadi mu tu neembele

Omulumenhu a ponokelwa keengangala ndele tadi mu tu neembele

2022-08-11  Festus Hamalwa

Omulumenhu a ponokelwa keengangala ndele tadi mu tu neembele

Omulumenhu weedula 32 okwa fya eshi vati a ponokelwa kookalyamupombo ndele tave mu tu neembele pefimbo kwa li tave mu nyeke omaliko aye.

Oshiningwanima eshi osha ningwa Etivali kolukanda Havana moWindhoek efimbo loufiku.

Nakufya okwa tongololwa oye Shoombe Aron Simaneka omukalimo womoHavana.

Nakuninga oshihakanwa okwa kufwa ongodi yaye yopeke noshoyo eenghaku edi kwa li a djala.

Omupopiliko wopolifi moshitukukwa shaKhomas Warrant Silas Shipandeni okwa hokolola ta ti Simaneka okwa li ta ende ta di koilonga fiyo ta nukilwa kovafekelwa vovalumenhu ndele tave mu tu neembele loikando ivali nonhulo.

Konima eshi vati a tuwa okwa twalwa koshipangelo shaKatutura fiyo ta xulifa keengulasha Etitatu.

Opolifi oya ti kape na omufekelwa a kwatwa po mekwatafano lefyo laye onghee omakonakono opolifi otaa twikile.

Lopokati opo, omulumenhu weedula 37 naye okwa ponokelwa kookalyamupombo vatano efimbo kwa li a hangika e li mondjila auka kombaanga ta ka tula ko oshimaliwa komavalulilo.

Oshiningwanima eshi osha ningwa Omaandaxa modoolopa yaSwakopmud efimbo lomoshanga shomutenya.

Omukonakoni woimbuluma wopolifi moshitukulwa Erongo Omupedu Commissioner Erastus Iikuyu okwa hokolola ta ti omulumenhu ou e li omunailonga mofitola yoWoermanbrock okwa li a tumwa kohona waye opo a ye a ka tule ko oshimaliwa N$1900 kombaanga.

Vati manga e li mondjila tashi ngi ombasikela konima yaye okwa dja ovafekelwa vovalumenhu ve kwete eembele tave mu pula oshimaliwa.

Opolifi oya hokolola tai ti ovafekelwa ove mu ningila omatilifo kutya otave mu dipaa ngeenge ina hala okuyandja oshimaliwa eshi e kwete.

Okudja opo omufekelwa umwe okwa teta ondjato yaye ei kwa li ili pombuda ndele tava faduka po va uka motuwa yolefa ihe na eenomola.

Opolifi oya ti mwene wotuwa oyo kwa endelela diva opo a shingilile auka koWalvis Bay. Nakuninga oshihakanwa okwa endelela opo a lopotela opolifi nokonima opolifi pamwe novakwashiwana ova longela kumwe mokukonga ovafekelwa.

Opolifi oya ka tala otuwa ei ya londa ovafekelwa koufano ovo ve li modoolopa yaSwakopmund nokonima ovafekelwa mwa kwatelwa omushingi wotuwa ova kwatwa po konima eshi hava hangika mombuwa, noshimaliwa osho va nyeka ko osha monika.

Opolifi oya kunghilila oshiwana opo shi kale a lushe sha kotoka ngeenge tashi i ile tashi di keembaanga shaashi ovafekelwa paife ove hole okulifa ovanhu ngeenge va umbata oshimaliwa.

Opolifi oya weda po tai ti eelefa dopaife ode li ninga tadi longele kumwe nookalyamupombo eshi hadi longifwa okulondeka po ookalyamupomba konima ngeenge ova nyeke po omaliko ovanhu.

Onghee opolifi oya ti ku keshe omushingi wolefa tai ka hangika a londeka po ookalyamupombo va nyeka po omaliko ovanhu naye ota ka kwatwa po.

– fhmalwa@nepc.com.na


2022-08-11  Festus Hamalwa

Share on social media