Minista gUuhaku nUundjolowele Kalumbi Shangula okwa tseyitha kutya ngashingeyi omumvu gwoCovid-19 ngoka a ningi omasiku eli mokoma eli woo kiifudhitho okwa penduka ashike natango oku li kiifudhitho.
Omumvu omu ti-22, omulumentu ngoka a kala eli monkalo ombwinayi, ashike ngashingeyi okuli monkalo tayi nuwa omeya.
Shangula okwa lombwele ishewe oshigwana kutya ngashingeyi Namibia okuna iiponga 31 yomukithi ngoka.
Oshiponga oshi ti-30 osho mukiintu omunamivo 22 ngoka eli omunasikola koIndia ngoka, a zi koIndia nodhila sigo omoSouth Africa e te ya moshilongo nombesa mo 26 May. Okwa ti mombesa moka omwa li aaNamibia yeli omugoyi, mboka woo nayo yali taya galukile moshilongo.
“Aakwashigwana mboka okwali ya kuthwa kuumbesa uuyali poongamba mpoka, kaanambelewa yuundjolowele koKarasburg, ya endela moAriamsvlei. Oya ikalekelwa nduno poGrunau Chalets moKarasburg okuza muMay 25. Omukiintu nguka okwali a konaakonwa moJuni 6, nomayamukulo oga za mo nduno mOsoondaha, ashike onkalo ye otayi nyanyudha,” oso Shangula a hokolola ngaaka.
Oshiponga 31 shomukithi ngoka oshili omukiintu gwomimvo 50 ngoka woo naye a zi koIndia nodhila eta tulwa moSouth Africa, naye woo okwali a ende mombesa shiponga oshiti 30 etaya ikalekelwa moGrunau Chalets moKarasburg.Naye woo onkalo ye otayi nyanyudha.
Ashike okwati kutya ndohotola gwopaumwe ngoka ha longo koshikono shoshimaliwa okwa kala ena omadhidhiliko ngaashi gwo ku ehama pomuliwu noshowo a kanitha uutowe wiikulya.
“Omumvu ngoka ngashingeyi okuli a ikalekelwa nale pehala ndyoka hali ikalekelwa aavu yomukithi ngoka mondoolopa ndjoka. Na onkalo ye otayi etitha omukumo,” osho Shangula a hokolola ngaaka pethimbo ndyoka ali tagandja omulombo kombinga yomukithi ngoka moshigwana.
Ashike okwa gwedhako tati kutya iipotha iikwawo mbyoka oyaanasikola mboka taya sikola koshilongo shaSouth Afrika na ayehe ohaya kala pamwe na oofelende. “Mboka ayehe oyeli nale momahala moka mwa ikalekelwa mboka ya za kiilongo yokondje moVenduka na nonande omayamukulo gawo otaga ulike ngaaka, inaya ulika nande omadhidhiliko gwombuto ndjoka,” osho a hokolola ngaaka.
Okwati mboka oyali ya konaaakonwa onga ompango yili po kutya kehe omuntu ta thiki moshilongo ota thikile kookamba dhokwiikalekelwa na otaka konaakonwa meendelelo, shoka osho nduno sha eta mbaka ya konaakonwe.
Shangula okwati nonande mbaka oya konaakonwa onkee ngaa aantu taya ka konaakonwa ishewe konima yomasiku 12 ngoka ya kala mokamba omanga inaya ethwa yaye komagumbo noshowo kaapambele yawo.
Ngashiingeyi moshilongo omuna iikonga yombuto ndjoka yili 29 moka 16 ya yeluka omanga 13 yili tayi ehama natango. Okwa hokolola woo kutya omulumentu ngoka ali li kiifudhitho sho ali monkalo ombwiinayi ngashingeyi okuli monkalo tayi etitha omeya na kiifudhitho okwa kuthwa ko nale nokuli oshoka ota ende ta kala nawa.
Ngashiingeyi mookamba dhokwiikalekela omuna aantu yeli 2460, omanga yei 1660 ya ethwa nale yaye komagumbo sho ya mana ko omasiku gawo . Aantu ye vulithe po 4588 oya konaakonwa omukithi ngoka moshilongo ashihe.