Konima eshi omhangu yadja mo, ponhele yoku ya keumbo, okakadona aka komido 18 oka oka ka kala poupundi vopondje yomhangulilo taka u omapoli ke kwete okaana ka ko. 

Okutala okakadona aka –kounona oka dja koukulunhu inaka fika – kake li ngeno pefimbo loku kala monghalo omo noku taalela omashongo oo ke li muo, unene tuu eshi ke li oko akeke. 

Nena, okwa li ke ya komhangu, koshibofa shekwatonghonga olo ka li ka ningilwa manga ke na omido 16. Ashike konima yomhangu, oka tameka oku elaela kehe na oshimaliwa sholefa yoku shuna keumbo. 

Ashike eshi tashi etifa eenghono osheshi ina ke li ekelela, oka tokola oke na omukumo oku mana elihongo lako nande keli mokati komashongo. 

Omunafikola ou okwa hokolola ta ti omulumenhu ou e mu kwata onghonga okwe mu ningila omatilifo kutya ote mu fingi ngeenge okwa anye oku ya naye moixulo, sho osho ke li ufa komalombwelo aye omo lwa oumbada. Taka ti opa pita ashike eemwedi mbali eshi ka kwatwa onghonga komulumenhu oo paife e li omufekelwa, koo ota ka pewa eteelelo komulumenhu oo kali ke na naye ekwatafani lomoihole. Ashike konima eshi okaana ka dalwa omulumenhu okaana okwe ke li kala. 

Okwa ti omulumenhu oo okwa faduka po paife no kake shi kutya oku li peni. 

“Ohandi hepekwa komadilaadilo efimbo keshe eshi handi kala handi li pula kombinga yomunyonena wopaixulo oo kwa li nda li ningilwa omudo wa djako pefimbo handi i kofikola,” ta hokolola. 

Okwa weda po yoo vali ta ti keu dite ombili eshi e na okaana keemwendi mbali kehe na xe molwashi omulumenhu waye eli kala eteelelo kutya kali shi laye. Okwa hokolola ta ti okwa li kwatwa onghonga pefimbo kwa li e li mondodo onhi-10 a hangika ta shange omakonakono oshikako shotete ashike okwa dopa shaashi okwa kala ta piyanekwa komadilaadilo. 

“Osha li efimbo longula nda yuka kofikola eshi nda sha ke na novalumenhu vatatu mwa kwatelwa omunailonga womeumbo omukwashiwana waAngola ou a kwata nge onghonga. 

Umwe womulumenhu okwa manga nge neengodi keenyala opo ndi ha faduke po nokonima okwa lombwela lange ta ti ngeenge onde mu anye ota fingi nge shaashi yee okwa dja koAngola,” ta ti. 

Onghee okwa ti okudja opo manga ve li mondjila va yuka keumbo lomufekelwa, umwe womvalumenhu ovo okwa kufa ondjebo te mu ningile omatilifo kutya ote mu yashe ngeenge okwa kuwu. 

“Efiku olo onda nangala keumbo lomufekelwa. Eshi kwa sha omufekelwa okwa lombwela nge opo ndi dje mo meumbo lavo shaashi va ti okwa uda kutya ohandi kongwa kumeme,” ta ti. Nakuninga oshihakanwa okwa hokolola ti okudja opo okwa ukilila kofikola noku lombwela hamushanga mofikola yavo kombinga yoixuna oyo a ningilwa. 

Omufekelwa okwa kwatwa po nokwa li a holoka momhangu yaNdangwa Omaandaxa lwoshikando oshitivali. 

Oshibofa shaye osha undulilwa komesho nomakonakono opolifi otaa twikile. 

Nakuninga oshihakanwa ta yelifa ta ti okwa tokola oku shuna kofikola mondodo-11 momwedi tau ya, oku li ashike manga pedu shaashi okaana kaye okashona. 

“Ehongo ola fimana onghee okaana kange otaka kala nameme pefimbo handi i kofikola,” ta ti. Omunawino woipambelele youfemba womunhu Rosa Namises okwa ti ovadali nava kale tava lopotele omhangu opo omulumenhu ou te li kale kutya eteelelo ka li shi laye a ningilwe omakonakono konima ngeenge okaana okadalwa. 

Namises okwa kumaida ovadali opo va kale tava ka kongo omayelele ngeenge ve na ounona vavo va taalela omaupyakadi a yooloka. fhamalwa@nepc.com.na