Ongudu ye liunganeka yokulwifa oimbuluma ya shiivika nawa oMen and Women Network oya tota po oprograma yokukala tai kwafele ovanhu ava ve li moluhepo moshitukulwa shaHangwena.

Meenghundafana a ninga naKundana omukulunhuwiliki woMen and Women Network moshitukulwa shaHangwena Nestory Moses okwa hokolola ta ti elalakano loprograma ei okuvatela ovanhu ve li momhumbwe yoikulya ile yoikutu nosho tuu. Moses okwa ti oprograma ei ohai kwafele neenghono ovanhu vomoshitukulwa shaHangwena ngeenge tashi ya poikulya.

“Oprograma ei oya nhuninwa okukwafela ovanhu ngaashi eefiye, ovanhu ve na oulema, ovanhu ava ve li moluhepo novakulupe,” Moses ta ti. Okwa ti opragama ei ohai pewa omakwafo taa di moshiwana unene tuu ovanangeshefa ovo vamwe ve li hava yambidida opragama ei.

“Ohatu pewa omakwafo ngaashi oikutu, oukutu voufila, oshivelelwa, omakumbafa noshimaliwa. Oinima ei ohatu i pewa koshiwana eshi shi na ehalo nolukeno lokuyambidida opragama yetu,” Moses ta ti. Moses okwa popya ta ti elalakano lopragrama ei okutaataya po oluhepo nondjala moshitukulwa shaHangwena, nokukwashipaleka kutya kape na omunhu ta ka nangala e na edimo tali kwena oukombwena moshitukukwa shaHangwena.

Moses okwa ti oshiwana osha pandula keyambidido e li hashi pewa okupitila mombelewa yoWomen and Men Network. 

Moses okwa indila kukeshe ou e na ehalo lokuyambidida opragama ei opo a kwatafana nombelewa yoWomen and Men Network i li petenda mOngha. Okwa ti ekwafo keshe ola tambulwa ko, onghee oshiwana nashi yambidide nakashona aka ve na po opo oprograma i shiive i ye komesho, yoo i twikile okuyambidida oshiwana.

Pexulilo okwa pandula oshiwana eshi sha kufa etokolo lomondjila opo shi kale tashi yambidida oprograma ei.