Iilonga yaRosalia Jonas yokoonyala, oye mu kutha momaapandaanda osho wo okukonkola piiyelo yoombelewa ta kongo iilonga.
Jonas oha hondjo iikutu mOndangwa, molukanda Uupopo.

Ta ti, kakwa li oshipu okuya po nongeshefa yokuhondja, ihe nani onkambadhala oyi vule okumwena.
“Ondi ihata po olwindji, andi kambadhala okukonga omboloto yandje, nonande olwindji okwa li tandi hala okutindila po pevi, onda kala andi itsu omukumo, kutya esiku limwe otandi ka humbuka, ihe itandi shuna po we pevi,” Jonas ta hokolola. Jonas  ta ti, sho haku ti uuwanawa ihawu zi po kapala ka yela, kashi shi iilombo.

Ta popi ta ti kehe gumwe e shi pondola milonga ye okwa enda momashongo ashike ina sholola.
“Aanyasha aakwetu, otandi mu kumagidha mu thikame, mu ka kambadhale nakehe shoka wu wete kutya owu na uunongo musho, ino sholola, ino kala wu na omayipulo kutya olye te ya okusapota, ookasitoma ohadhi kala po aluhe,” Jonas ta ti ngaaka.
Jonas okwa tameke okuhondja oomvula ine dha pita, sho kwa li ha kwathele miihondjelo ya yooloka. Ta ti naashoka osha gwedhele uunongo we wu ye pombanda.

“Onda li nda kambadhala okuninga ohiila yeshina opo ondi vule okugongela oshimaliwa sho kulanda eshina lyandje mwene, oshowo iilongitho ya gwedhwa po,” ta popi ngaaka. Ta hokolola ta ti, aantu oyendji oya kala taya taambathana uuyelele kombinga yokuhondja kwe, taya tanga nokutumbaleka kutya oye dhingi mokutata oshikutu.

Jonas ta ti, okuhondja kuye okati komokutsi. “Shoka sha kwata ndje okuya komeho, ehala lyokulongela oshowo iilongitho ayihe nda pumbwa okulongitha,” ta ti ngaaka.

Omuhondji nguka okwa ti, uunongo mbuka okwa li ashike a valwa nawo oshoka ita dhimbulukwa a kuutumba mosikola yokuhondja.
Jonas oha hondjo iikutu yoludhi kehe, noyiituthi ayihe.
Okwa gwedha po ta ti, ondando ye oyi li pevi lela, oshoka elalakano kali shi lyokulonga iimaliwa ashike, ihe okuhole iilonga ye.
Kehe ngoka e na ehalo lyoku yambidhidha omukiintu nguka okuhuma komeho, okwa manguluka okudhenga konomola 081 3872 301.