Ovanailonga vepangelo hava tonatele omihandjo dokeesekundofikola domOhangwena otava nyenyeta eshi vati epangelo la teta ko oshimaliwa eshi kwa li hava pewa shomaumbo.
Ovanailonga ve na oshimaliwa sha tetwa ko ovava ashike hava di momaumbo epangelo oo e li meni leefikola hava ifanwa oomatrona.
Ovalombwela Kundana tava ti okwa li hava mono oshimaliwa sha wedwa keendjabi davo shoN$600 hashi pewa keshe omunailonga wepangelo ha longo komihandjo dofikola, ashike paife osha kufwa po.
Onghee paife otava nyenyeta tava ti kasha li pauyuuki eshi epangelo la teta ko oshimaliwa shavo omanga ovanailonga vakwao ava ihava di momaumbo epangelo ohava mono natango oshimaliwa shavo.
Ova hokolola tava ti tete manga kwa li eshi hava di komaumbo avo opaumwene okwa li hava mono oshimaliwa osho hashi yandjwa ashike konima eshi va ka dja momaumbo ofikola oshimaliwa shavo osha tetwa ko. Eshi a ninga eenghundafana naKundana umwe ha longo komuhandjo kosekundefikola yaHaimbili Haufiku okwa holola ta ti ova lombwelwa kombelewa yomukulunhuwiliki wehongo kutya ngeenge omunhu ha longele komuhandjofikola ota pewa onduda oshali meni lomuhandjo.
“Ope na oveta ya tulwa po kepangelo kutya ngeenge omunhu ha longo komuhandjo ina pumbwa okukala ta di kondje yofikola shaashi okwa pumbwa okukala e li komuhandjo efimbo keshe ta tonatele ovanafikola,” ta hokolola.
Umwe ha longo komuhandjo kosekundefikola yaPonhofi okwa lombwela Kundana ta ti ke udite ombili eshi a kala ta nanwa N$600 oule weedula hetatu omanga pe na ovanailonga vakwao ihava nanwa oshimaliwa osho.
“Okwa li twa lombwelwa kutya oshimaliwa shetu ohatu shi alulilwa ashike fiyo opapa ina tu mona enyamukulo. Otwa kendabala okuya kombelewa yomukulunhuwiliki wehongo a tu nyenyeta ndele iha pa ningwa sha,” ta ti.
Eshi Kundana a kwatafana nomukulunhuwiliki wehongo mOhangwena Isak Hamatwi okwa ti opena omilandu hadi landulwa kutya ngeenge omunailonga ohadi momaumbo epangelo oku na okunanwa oshimaliwa osho kwa li a mono shomaumbo sha wedwa po.
“Oihava futa omeva, olusheno vo ohava di momaumbo epangelo onghee naashi osha eta opo va kale tava nanwa oshimaliwa osho tava nyenyeta,” Hamatwi ta ti.
Okwa weda ta ti ovanailonga hava di komaumbo avo opaumwene ihava nanwa oshimaliwa shaashi ihava di momaumbo epangelo.