Ehangano lyi na sha noondjila lyoRoad Authority (RA) olya kumagidha aahingi yiihauto moshitopolwa shaShana ya kale uupathi uuna taya hingi omolwoondjila dhimwe dha tetwa ko komeya.

Ehangano lyoondjila olya ti, ope na oondjila dhimwe dha patwa, onkene oshigwana hashi longitha oondjila dhokuumbugantuzilo wOshakati nashi kale shi na uuyelele omanga inaashi tsikila nomalweendo gawo. Olya tothamo ondjila ndjoka ya za puShipepe yu uka kOontanadhambinga ya pata manga pakathimbo omolwomeya gefundja ngoka taga tondoka go ogendji. 

“Aakalimo yokomikunda ngaashi Ohakweenyanga nopopepi nandhi longithe opate ndjoka DR4102 Ohakweenyanga yu uka kOmeege,” ehangano lya nyola ngaaka. Ondjila yokomukunda Amunganda moshikandjohogololo shOndangwa Rural nayo oya yogwa po komeya, onkene itayi vulu oku endwa kiihauto.

Omukalimo gumwe gomomukunda Amunganda Saima Shikalepo okwa ti, omeya oga londa kombanda yopate. ‘’Osha nika oshiponga okupitila momeya moka oshoka otwa londodhwa kutya og ena iinima oyindji tayi vulu oku etela oshigwana uupyakadhi,’’ ta nyenyeta ngaaka.

Ta ti, aanona yosikola oye na okupitila momeya moka, oshowo mboka ya hala oku ka landa uukwashikependjewo koositola. Ta gwedha po ta ti, mboka taya ehama oshowo taya shuna kiipangelo momasiku ya shangelwa oya tetwa ko kondjila. 

“Onkalo ndjoka otayi thiminike oyendji ya pite momeya moka oshoka oyo ashike ondjila yi li po,’’ ta ti ngaaka. Omugandji gwomauyelele gwefundja moshitopolwa shaShana Jonas Kapenda okwa kumagidha aahingi yiihauto kaaya thiminike onkalo ndjoka, uuna ya mono omeya moondjila, okuyanda iiponga. 

“Omeya ngoka oge na oonkondo notaga vulu okufaalela iihauto, onkene aahingi otaya kumagidhwa ya longithe oondjila dhimwe ndhoka kaadhi na omeya,’’ ta kumgaidha ngaaka.

vkaapanda@nepc.com.na