Opolifi moshitukulwa shaShana otai indile moshiwana kwaau e na ouyelele kombinga yomukainhu ou a kupulashi okaana kaye oko ke lituwa ka fya monailona yoimbodi.
Okaana kokakadona oke lituwa Etivali modoolopa yaShakati konima yeembelewa damuni waShakati efimbo lokomatango.
Omupopiliko wopolifi moshitukulwa shaShana Inspector Thomas Aiyambo okwa hokolola ta ti fiyo opapa kape na ouyelele kutya okaana oka kupulwashi kulyelye shaashi ponhele opo inapa hangika omunhu.
Aiyambo okwa ti okaana oke lituwa komunaloinga wamuni nokonima okwa lopotela opolifi.
Okwa ti kukeshe ou e shi omukainhu kwa li e na okaana ndele keka na vali na kale a lopotela opolifi keshe i li popepi.
Okwa yelifa ta ti opolifi itai ka popya edina lomunhu ou taka yandja ouyelele onghee oshiwana otashi kunghililwa opo shi kale sha manguluka okuyandja ouyelele ou.
Aiyambo okwa ti elalakano opo ina yokaana a kale a kwatwa po diva shaashi okwa longa oshimbuluma eshi a kupulashi okaana kaye. Eshi a kwatafana naKundana, omuxungimwenyo mouninsteli woukashike kookanhu Selma Shilongo okwa kunghilila ovakainhu opo va kale tava twala ounona vavo koipangelo ngeenge tava hepekwa koupyakadi wopamadilaadilo.
Okwa ti ovakainhu nava ka konge omakwafo koipangelo ile keembelewa douministeli woukashikekookanhu shaashi oku ekelashi okaana kaku shi ekandulepo lomukundu.
Shilongo okwa yelifa ta ti ovakainhu vamwe ohava kala va kwatwa koshinyenu unene tuu ngeenge xe yokaana iha yambidida okaana kaye.
Onghee naashi ohashi eta opo ina yokaana a kale a kwatwa komhepo yokukupulashi okaana kaye shaashi oha kala a lulilwa konghalo.