Ouministeli wouhaku owa ti otau ka e ta po elunduluko kombinga yovanhu ava ve na okutunhilwa ombuto yoCovid-19. Meenghundafana a ninga naKundana omukulunhuwiliki mouministeli wouhaku Ben Nangombe okwa ti ope na omalunduluko a wedwa po taa ka ningwa kombinga yovanhu ava ve na okukala va tunhilwa. “Ovanashilonga ngaashi ovapolifi, ovanashilonga vokeengaba, ovatoolinghundana, ovanashilonga meemina nosho yo ovanashilonga vokoupale veedila ngaashi okapale keedila kaWalvis Bay naHosea Kutako ove na okukala va tunhilwa ombuto yoCovid-19 navo paife,” Nangombe ta ti. Okwa yelifa kutya elunduluko eli otali ka tulwa moilonga okutameka momafiku 19 Apilili.

Etameko letunhilo loCovid-19 moNamibia ola tamekele momafiku 25 Maalitsa, omu la tameka ashike moitukulwa imwe ngaashi Khomas nErongo.

Eshi osho oshikando shotete Namibia ta tunhile ovanhu kombinga yombuto yoCovid-19.

Okwa popya ta ti elalakano opo ovanashilonga va wedwa po va ka tunhilwe omolwashi ova pumbwa okumangululwa diva voo va shiive va ka yandje omayakulo koshiwana. Nangombe okwa twa omufindo ovanashilonga voministeli youhaku opo va twikile nokuya momwaalu uhapu va ka tunhilwe diva. Nangombe okwa holola ehafo eshi oshiwana tashi twikile nokuya momwaalu uhapu opo shi ka tunhilwe. Yee ta ti aishe oi li peenhele komandiki ouhaku oku ku li taku tunhilwa ovanhu, onghee okwa twa oshiwana omufindo opo shi ka tunhilwe shaashi oCovid-19 omukifi woshili wa nika oshiponga. 

Onghee okwa ti otashi kwafele unene ngeenge omunhu a tunhilwa ombuto yoCovid-19 shaashi eshi otashi shunifa omhito pedu opo omunhu aha kwatwe kombuto ei. Pexulilo okwa ti ovanhu nava twikile nokuliufa komalombwelo nokeemhango doCovid-19.