Ngoloneya woshitukulwa shaTjozondjupa James Uerikua okwa lulilwa konduba youmutwe oshoyo omaufemba a yooloka a kalela eembelewa ehe na oovene.
Pefimbo a li ta yandje omushangwahokololo woshitukulwa wodula 2022/2023, Uerikua okwa tumbula kutya ouministeli woikwameni netonatelo lokeengaba owa kala u na oumutwe ve li 4 828 inava ilwa keembelwa davo.
Oumutwe ava vati owovanhu veedula da yookola. “Oumutwe ava otashi dulika va kale kwa li ngeno
va kwafela oovene mokukonga omauwa mahapu epangelo, ndele oovene inave ke va tala ko keembelewa,” Uerikua ta tumbula.
Uerikua okwa kunghilila ovanhu opo va tameke oku ka tala oumutwe vavo keembelewa douministeli odo di li popepi navo. Okwa popya yoo kutya okwa pula oministeli yoikwameni i ninge omalandulafano okutwala oumutwe kovanhu ava ve li koitukulwa yokomikunda.
“Onda ninga yoo omaindilo okukonga osheendifo shi twale omaufemba ovanhu vomoshikandjohoololo shaTsumukwe opo va twaalelwe oufemba wavo shaashi ove li kokule nodoolopa.
Eshi ohandi shi ningi shaashi ovanhu ve li komikunda ova patelwa kondje komauwa ahapu,” ngoloneya ta ti.
Uerikua okwa tumbula kutya oshikandjohoololo shaTsumkwe oshi na omwaalu wovanhu vahapu tava hapupala vehe na omaufemba, osho sha eta vahapu va patelwe kondje keemhito doilonga. “Moule wefimbo olo tuu olo natango oshitukulwa osha didilika omwaalu wounona 9 507 opo va dalwa novakulunhu ve lishangifa oumutwe va fika po 10 318,” ngoloneya ta ti.
Uerika okwa twikila kutya: “omufindalandu waNamibia owa holola kutya keshe omunhu a wanifa eedula 16 oku na okukala e na okamutwe koshilongo, nohatu kendabala opo ovanhu aveshe va tyapule omauwa taa yandjwa moshilongo.”
Okwa popya kutya keshe tuu ou ehe na oufemba ita ka mona ekwafo okudilila mopologalama yokuvatela ovakwanaluhepo hai ufanwa ‘Rural Development Programme’ (RDP).
Moule wodula 2022/2023 omwaalu woimaliwa ya fika poN$862 958 owa longifwa okuxumifa komesho eepologalama di li nhee do-RDP. Eepologalama ongaashi oikulya, exumokomesho leengeshefa dopedu, oshoyo okuyambidida ovanafaalama tava mono oixuna.
Eepoloyeka di li 15 natango oda dulwa okuwanifwapo odo dali oshitukulwa shomwaaimwe i li koshi yopologalama ei.