Festus Hamalwa
Ounona vavali ovo va ninga oihakanwa yomahepeko omomaumbo manga ve li mefiloshisho laxekulu nomukulukadi waye, ova tembulwa ko keumbo lovatekuli vavo.
Oonakuninga oihakanwa ava paife ova tembulwa ko kOhadiwa nove li keumbo lomukwapata wavo komukunda Onanke moshitukulwa shaShikoto.
Nangula Thomas (eli halo edina laye loshili) pamwe nokamwainamati komido 10 paife ova tamekifwa ofikola kOnanke kelombwelo louministeli woukashikekookanhu nonghalonawa yokaana.
Nangula oo e na omido 14 vati okwa tekauka omayoo atatu eshi a dengwa kuxekulu nokuinakulu omudo wa dja ko.
Pefimbo Kundana a ninga eenghundafana nokaana aka, oka hokolola taka ti ova kala nokuningilwa omahepeko kovatekuli vavo okudja momudo 2018 fiyo 2022. Ovatekuli ava vati ohava di kOngwediva, ashike ove na yoo eumbo lomiti komukunda Ohadiwa moshitukulwa shaHangwena.
Nangula kwa hokolola ta ti onghalo ohai kala ya xwepopala ngee ooxekulu nainakulu vehe mo meumbo, ashike ngee ove ya po va dja kOngwediva ndele tava hange eumbo la kaka ile ngeenge inava tyava oikuni ohava dengwa nai.
“Ohatu dengwa needibo kutatekulu, meekulu naye ohe tu denge noimwati. Omafimbo amwe ohatu i kofikola inatu lya neemhadi kombada nokufaula eetundi,” Nangula ta hokolola.
Okwa ti neudo ketameko lodula pefimbo va tameka ofikola okwa ifanwa komuhongifikola waye oo e mu pula kutya omolwashike a teka omayoo nomolwa shike ha kala ta pwaalala nokukofa meetundi.
“Onda hokololela omuhongifikola wange kutya ohatu hepekwa keumbo. Okudja opo omuhongifikola wange okwa lopotela ovanambelewa vouministeli voukashikekookanhu nonghalonawa yookaana,” ta hokolola. Ta ti eshi osha eta opo xekulu nainakulu va kwatwe po sha landula omapulapulo oo va ningilwa kopolifi.
“Onda pandula omuhongifikola wange eshi a shivifila ovanambelewa wouministeli woukashikekookanhu, ngeno ka li po ngeno osho natango ohatu hepekwa keumbo,” ta ti. Nangula okwa weda po ta ti kakwa li he litula mo ngeenge e li meetundi molwaashi ha kala ta hepekwa konghalo yopamadilaadilo molwokuhepekwa.
“Paife ohandi litula mo nawa moinyangadalwa yange yofikola,” ta ti. Otaku hokololwa kutya ounona ava ovapambele vomushamane (omutamanekwa) u e li oye mwene weumbo. Nangula keumbo kOhadiwa okwa ya ko e na eedula nhee omanga okaana kokamati kOhadiwa oka ya ko ke na eedula mbali konima eshi ovakulunhu vaye aveshe va xula ko.
Nakuninga oshihakanwa okamati keedula 10 oka hokolola taka ti paife oke na ombili yokomwenyo molwaashi ihaka kala vali ka tila ngeenge ke li meumbo.
“Eshi twa li kOhadiwa okwa li alushe handi kala nda tila ngeenge onda mono tatekulu. Omafimbo amwe ohandi hondama ngeenge onda udu ondaka yaye. Onda pandula unene eshi twa tembulwa ko keumbo oko,” ta hokolola.
Omukulupe weedula 70 ou paife ta tkula ounona ava, okwa hokolola ta ti okwa hafa eshi ovatekulu vaye va dja ko keumbo kOhadiwa.
Okwa ti ounona otava ulike ve litula mo moilongwa yavo kofikola ipe.
Omulumenhu weedula 51 nomukulukadi waye weedula 48, ova holoka nale momhangu mOshakati. Ava otava tamanekwa oshibofa shomahepeko omomaumbo omo vati va denga ovatekulu . Ova anyenwa elifutilemo modolongo.
Oshibofa shavo osha undu lilwa komafiku 09 Juni neudo opo opolifi i ninge omakonakono e lixwa po. Ovatamanekwa ova kwatelwa keumbo lavo komukunda Ohadiwa moshitukulwa shaHangwena oshivike sha dja ko. Opolifi oya koleka tai ti ovaholafani ava ova kala nokuningila ovatekulwa vavo omahepeko omomaumbo efimbo lile.
- fhamalwa@nepc.com.na