ONGWEDIVA - Omunangeshefa umwe okwa ti yee mongeshefa okwa kala mo okudja mo2018 eshi e ya po nongeshefa yaye yokuninga oinima yaye mwene okudilila moushitwe.

Johanna Nghidinua okwa ti ongeshefa yaye oye liameka mokueta po oinima ya yooloka okudililwa meenhanga ngaashi omaadi okuteleka, eefewa okudilila momashini oikombo noinima ikwao yokuwapaleka.

Mwene woZayon Manufacturing and Trading cc, Nghidinua, okwa yelifa kutya okwa tameka tete okuninga oinima yokuwapaleka osho she mu twala ponghatu yokuweda po yoo oinima ikwao. “Oinima ihapu ongaashi eengongo omo nda ka kwatwa kediladilo lokulonga noipeta yado ndi tale ngeenge ohandi dulu oku i longifasha oshinima shi na oshilonga, nonda mona mo sha. Konima onda ka lombwela yoo umwe womeefelende dange kutya ondi na edilaadilo lokuninga eefewa, ta pe nge ondunge yokuninga eefewa momashini oikombo,” Nghidinwa ta tumbula.

Okwa tumbula kutya paife ngaha oku na oitai yongeshefa mEenhana, Opuwo oshoyo mOngwediva nokwa yeulula eemhito doilonga kovanhu ve li 13.

“Ohandi taalele yoo omashongo kovanhu vahapu ngeenge tave ya okutalela po ongeshefa yange ohava kala va fya oinima yange ounye shaashi vati oya longwa moNamibia,” Nghidinwa ta tumbula. Okwa ti yoo kutya omashongo akwao natango okulanda eenhi noipumbiwa aishe yomongeshefa yaye.

“Ohandi kala yoo ndi udite ombili shaashi ovanhu vahapu ohava kala va panda oinima yange ei handi eta po,” Nghidinua ta popi. 

Okwa ti okwa hala okutwa omukumo ava va hala okutameka ongeshefa yoludi eli kutya inava laata natango nava pule ashike komesho.