Elelo lopamufyuululwakalo lOukwanyama ola pula epangelo opo li kaleke po eameno loushitwe womiti hadi dulu okukufwa oihemba yokupanga omikifi da yooloka.
Pefimbo kwa li ta lesha oshipopiwa shelelo lOukwanyama kombinga yefimano lomiti hadi di oihemba komutumba womalelo opamufyuulukwakalo wa li kEenhana oshivike sha dja ko, elenga Efraim Weyulu ola ti okwa didilikwa omiti dihapu hadi longifwa okupanga omikifi da yooloka hadi kala tadi tetwa po shaashi kape na eameno loushitwe womiti odo. Weyulu okwa ti omiti oda fimana shaashi ohadi kwafele oshiwana ngaashi okuhakula omikifi da yooloka noshoyo okukandula po ondjala noluhepo tashi pitile mokulonga oikulya tai di momiti.
“Ovanhu ohava xupu meedjo da yooloka hadi di momiti ngaashi eemheke, eengongo dokukola nokutenda omaxuku okuninga ondjove,” Weyulu ta ti.
Okwa hokolola ta ti unene tuu oitukulwa yokonooli ovanhu ohave limonene oyuuyemo yavo ngeenge tava landifa odjove, omaadi eemheke okuvava, nokukwafela opo omunhu aha kale e na oshipa sha tenda.
“Odjove oya fimana shaashi ohai dulu nokutumwa kondje yoilongo. Onghee eshi otashi yambula po eliko loshilongo tashi pitile meedjo doilongomwa tai di momiti.
Weyulu okwa popya kombinga yomiti odo hadi di oihemba ngaashi okadimeti aka longifwa okutulela mombelela ngeenge oshimuna sha fya komikifi wombulwa, omuhanguti hau longifwa okudipaa eenghupa noshoyo eena koimuna nokovanhu noshoyo omunghudi hau pange omukolo neshikisha nomukota. “Omunghudi oo umwe wa kala tau dana onghandala mokukondjifa ombuto yoCovid-19 eshi wa kala tau longifwa kovanhu oku litwimikila ngeenge ve na omukolo neshikisha,” Weyulu ta ti.
Okwa ti elelo lOukwanyama otali indile oumisteli wouhaku nonghalonawa, oumisteli womidingonoko nomatalelopo noshoyo ouministeli wounamapya, opo u kale wa tula po omilandu dokukaleka po eameno loushitwe womiti. “Omiti oda ninga oihakanwa yokutetwa ngeenge oshiwana sha hala okutunga po omalukalwa ile okuninga po eendjila. Eedoolopa dimwe eshi tada di ende tadi kula nokuwedelwa ohashi eta opo omiti di tetwe po shaashi muni oha kala a hala onhele yokutunga po,” Weyulu ta ti.
Onghee okwa kunghilila oshiwana opo shi kale sha fimaneka omufyuululwakalo mokukala tashi kale ke po omiti hadi di oihemba. “Efimbo olo nale ovanhu kakwa li hava tete po omiti hadi yakula omikifi da yooloka shaashi ovanhu nale okwa li va fimaneka omufyuululwakalo,” Weyulu ta ti.
Okwa weda po ta ti ouministeli wehongo owa pumbwa okukala wa eta po oshilongwa kombinga yoihemba shi kale tashi longwa meefikola opo ovanafikola ve lihonge kombinga yefimano lomiti odo hadi dulu okudja oihemba. “Ovadali natu longeni omaludalo etu kombinga yefimano lomufyuululwakalo noshoyo oihemba nghee hai pange omikifi da yooloka,” Weyulu ta ti.