Festus Hamalwa
Ovanafikola 213 moshitukulwa shaShikoto otava faula keetundi omanga vamwe ihave litula mo vali meetundi konima eshi va kwatwa komukifi wonghana.
Ovanafikola ova ninga oipute keenyala, shaashi ohava kala tave linyaa eshi tava nyuwa efimbo keshe ngeenge ve li meetundi nokomaumbo.
Ovanafikola va kwatwa konghana ova dja keefikola 12 ngaashi Ohahati Primary School (13), Oshima Primary School (41), Omboto Primary School (20), Olukupa Combined School (9), Omutwewomhedi Combined School (22), Oshilimeya Primary School (10), Onalusheshete Primary School (34), Oshikondiilwa Primary School (4), Omutunda Primary School (13), Epuku Primary School (17), Eengodi Primary School (27) nElambo Combined School (3).
Omukulunhuwiliki wehongo moshitukulwa shaShikoto Aletta Eises okwa hokolola ta ti ovanafikola ova monika omukifi wonghana konima yoivike ivali.
Eises okwa hokolola ta ti onghana otai piyaaneke elihongo lovanafikola molwaashi ihava kala ve li ve litula mo pefimbo leetundi.
“Ovanafikola vamwe ohava kala va tila okupewa onghana kuvakwao. Onghee eshi osha eta ovanafikola va kwatwa konghana va kale inava manguluka vali ngeenge ve li meetundi molwaashi ohava kala va tondwa kuvakwao,” ta ti.
Eises okwa weda po ta ti ovahongifikola navo ova kwatwa koumbada wokukwatwa konghana unene tuu ngeenge tava hongo.
“Otwa shivifila ombelewa youhaku moshitukulwa shaShikoto opo i dule okuyandja omayakulo opauhaku diva kovanafikola va kwatwa konghana shaashi onghana oya nyika oshiponga neenghono,” ta ti.
Eshi a kwatafana naKundana omunambelewa wouhaku koshipangelo shaCentral moWindhoek noku na owino momikifi da yooloka, Dr Laimi Ashipala okwa ti onghana ohai tandavele momikalo da yooloka ngaashi meenhele da kaka di hadi ovanhu.
Onghee okwa ti ekako olo unene li li oshietifi shonghana moshiwana.
“Onghana ohai tandavele noupu ngeenge omunhu e na onghana a ya mekwatafano nomunhu mukwao. Onghee osha fimana opo omunhu ngeenge a kwatwa konghana aha kale mokati kavakwao shaashi ota dulu okutandandaveleka onghana noupu,” Ashipala ta ti.
Okwa weda ta ti osha fimana ngeenge omunhu a kwatwa konghana opo a twalwe koshipangelo diva molwaashi onghana ohai dulu okupangwa.
Ashipala okwa yelifa ta ti omunhu oha dulu okukala nonghana oule wefimbo lile ngaashi oivike itatu ile oule womwedi.
Ovanafikola va kwatwa konghana ova hokolola tava ti ohava longifa omeva va tula mo omwongwa okulipanga onghana omanga vamwe ova ti ohava longifa omeva oilya.
“Otu li kokule nokapangelo. Paife onda kwatwa konghana oule woivike ivali ashike fiyo opapa inandi ya koshipangelo. Ohandi longifa ashike omeva a pya mu na omongwa,” omunafikola Junias Hamutoni ta hokolola.
Okwa weda po ta ti iha dulu vali okushanga shaashi okwa ninga oipute keenyala.
“Ihandi kala nda manguluka ngeenge ndi li pokati kovanhu molwaashi ohandi kala handi nyuwa efimbo keshe,” ta ti.
Omunafikola a kwatwa konghana Immanuel Joseph weedula 17, e li mondodo onhihamano okwa hokolola ta ti onghana omukifi wa nyika oshiponga molwaashi iha kofa keumbo, ihe litula mo vali ngeenge e li meetundi.
“Omafimbo amwe ohandi faula keetundi omanga omafimbo amwe ohandi i kofikola molwaashi inandi hala okupitililwa po koinyangadalwa yange yofikola,” Joseph ta hokolola.
Okwa weda po ta ti omhumbwe yomeva momikunda davo oyo i li oshietifi shonghana molwaashi iha va kala ve na omeva okulikosha.
“Omafimbo amwe ohatu i kofikola nomidjalofikola inadi koshwa ile tu ye kofikola inatu likosha molwaashi ihapa kala pe na omeva a wana. Onghee ohatu ka teka kokule momifima,” ta ti.