Omukulunhu woshikondo shomavyulonghalo Commissioner General Raphael Hamunyela okwa ti ovanambelewa ve dulife 10 hava longo komavyulonghalo ova taatawa moilonga neudo eshi hava yandje eengodi kovanadolongo, vo tava futwa.
Hamunyela okwa ti unene tuu evyulonghalo laWindhoek ohaku lopotwa omwaalu muhapu wovanadolongo tava kwatwa ve na eengodi eshi ve di pewa kovanambelewa hava longo momavyulonghalo.
Okwa ti keshe efiku komavyulonghalo oha ku kwatwa ovanadolongo ve na eengodi nohava kala ve li mekwatafano novapambele vavo, ookaume noshoyo ovanambelewa hava longo mevyulonghalo.
Edi Hamunyela okwe di popya Etitatu eshi a ninga eenghundafana naKundana eshi a hokolola ta ti omavyulonghalo okwa taalela eshongo lakula leengodi dopeke tadi longifwa meedolongo.
“Konima eshi twa ninga omakonakono otwa didilika kutya eengodi dili kovanadolongo ove di pewa kovanambelewa hava longo momavyulonghalo, hava futwa oshimaliwa opo ya ndje eengodi,” Hamunyela ta ti.
Hamunyela okwa ti unene tuu ovanadolongo ava ve na oshimaliwa ovo unene hava kwatwa neengodi, hava futu vo tava yandje yoo oshimaliwa kovanambelewa opo veke va landele eengodi.
Okwa hokolola ta ti ovanadolongo vamwe oha tumu ovakwapata vavo opo va yandje oshimaliwa shombobu kovanailonga vokomavyulonghalo.
“Ovanambelewa komavyulonghalo paife ova ninga ookaume novanadolongo nohava kala ve li mekwatafano lopangodi tava longele kumwe okuninga oipindi,” Hamunyela ta hokolola.
Okwa weda ko ta ti ovanadolongo ohava kala tava tula ovanhu mokatoo pamukalo woku ninga oipindi komalungula ngaashi okulandifa eetuwa doipupulu, ashike konima ngeenge omunhu okwa tumu oshimaliwa shaye omunadolongo oha shendje onomola yongodi yaye.
Hamunyela okwa yelifa ta ti ovanambelewa komavyulonghalo ohava ninge alushe eenghendabala dokukala va ningila oshiwana omakonakono ngeenge tashi uya okutalela po ovanadolongo vavo ngeenge ove na eengodi noingangamwifi ile ahawe.
“Otwa didilika yoo vali ovanadolongo vamwe natango tava twikile nokukala ve li mekwatafano lopaihole novanambelewa,” Hamunyela ta ti.
Okwa hokolola ta ti ovanambelewa vamwe ohava longifwa oilonga ya nyika youmbudi kovanadolongo, hava hekwa opo va etele ovanadolongo oingangamwifi.
Hamunyela okwa kunghulila oshiwana opo shi kale tashi longele kumwe nombelewa yaye mokukala tashi lopota ovanambelewa tava longo oulingilingi komavyulonghalo.
“Omunambelewa keshe ta ka lopotwa ta longo oulingilingi ota taatawa moilonga diva opo a ninge oshihopaenenwa sha vakwao,” Hamunyela ta ti.