Omukulunhuwiliki mouministeli wouhaku nonghalonawa Ben Nangombe ota ti omwaalu wovanhu tava kwatwa kombuto yoCovid-19, ava va tambulilwa meembete owa shuna pedu.

Nangombe okwa ti ouministeli wavo otau pandula oshiwana eshi sha kala nokuli ufa komilandu doCovid-19, osho sha kwafa opo omwaalu u kale wa shuna pedu.

Oku tala komivalu hadi pitifwa alushe kouministeli, moipangelo ka muna vali ovanhu vahapu vena ombuto ei, unene tuu oipangelo yomoWindhoek noipangelo yomoshitukulwa Erongo.

“Ouministeli wouhaku owa ninga omandiki aa kwa li anuninwa oku tula ovanhu tava kwatwa kombuto, ashike mopaife momandiki amwe ka muna ovanhu. Ngaashi endiki eli opo twa patulula moWindhoek lina eembete 40 omuna ashike ovanaudu vatatu,” Nangombe ta ti.

Kakele kovanhu tava vele, Nangombe okwa ti nomafyo ovanhu ava tava fi kombuto nao okwa shuna pedu.

“Ouministeli wouhaku owa longa noudinini opo ukwashipaleke kutya otau lwifa ombuto ei, onghee natango ohatu twikile nokulonga nelitulemo shaashi ohatu lalakanene okukala twa xulifa po ombuto ei moshilongo,” Nangombe ta ti.

Okwa kunghulila oshiwana opo shi tunhilwe opo va kale va amenwa kocovid-19.