Omupedukomufala koshikondo shomavyulonghalo moNamibia, Deputy Commissioner General Sam Shaalulange okwa ti moshilongo omu na ovanadolongo 898 va pewa ehandukilo leedula donhumba modolongo eshi monika ondjo moibofa yedipao.

Okwa ti oonakudipaya vahapu ova kwatwa po shaashi va kufa eemwenyo ovakainhu vavo, ookaume noshoyo ovapambele vavo.

Eedolongo domoshitukulwa shaKhomas odo di yadi ovanhu va dipaa taku landula evyulonghalo lOluno.

Omavalulu omavyulonghalo aeshe moshilongo otaa ulike e na ovanadolongo aveshe kumwe 4 552 ovo va longa oimbuluma ya yooloka.

Ovalumenhu ve li momvyulonghalo ove li 4 403 omanga ovakainhu ove li shike 149. 

Oshimbuluma shekwatonghonga oshi li ponomola onhivali eshi ovanadolongo 797 ve li modolongo shaashi va kwata ovanhu onghonga, oibofa youmbudi woimuna oi li pomuvalu 646, oibofa yokuteya omaumbo 661, oibofa yomahepeko omomaumbo 522 mwa kwatelwa oibofa younona 22 eshi navo va ninga oihakanwa yokuhepekwa, oibofa yonghendabala yedipaoo 229, oibofa yoingangamwifi 240, oibofa yokulivaka meedolongo 226, omanga oibofa yokukwata po ovanhu ombabyona i li po66 noshoyo oibofa yoiponga yeetuwa 62.

Edi Shaalulange okwe di popya komutumba wovalumenhu u li mOngwediva pefimbo kwa li ta kumaida ovalumenhu opo ve li kaleke kukule nokulonga oimbuluma.

Okwa ti ovalumenhu ovo unene va ninga oihakanwa yokudipaa ovanhu eshi omwaalu muhapu wovanhu ve li modolongo va dipaa owo valumenhu.

“Ovalumenhu natu kaleni hatu ka konga omakwafo ngeenge tu li momaupyakadi ile ngeenge tu na omakwatafano etu opaihole itaa ende vali nawa shaashi okudipaa kaku shi ekandulepo lomukundu,” Shaalulange ta ti.

Omutumba wovalumenhu owa xula mEtine nokwa li tau lalakanene okuyandja ehongo nouyelele kovanyeumbo nokoumatyona opo va kale vali tava longele ovakainhu ile ovalumenhu vakwao ominyonena.

 fhamalwa@nepc.com.na