New Era Newspaper

New Era Epaper
Icon Collap
...
Home / Ovanyasha tave linyangele okashona mokuhondja eenghaku

Ovanyasha tave linyangele okashona mokuhondja eenghaku

2022-09-19  Festus Hamalwa

Ovanyasha tave linyangele okashona mokuhondja eenghaku

“Onghendabala oi dule okumwena. Otwa dopa ondodo onhi-12 ashike kape na ou te tu futile ofikola opo tuye tu ka xwepopaleke oilongwa yetu. Onghee paife otwa ninga onghendala opo tu kale h tu hondjo eenghaku opo tu dule okumona oyuuyemo.”

Aa omatumbulo aInnocent Heita weedula 19 naOnesmus Sheyanale weedula 21 tava hokolola nghee va tota po ongeshefa yavo yokuhondja eenghaku.

Oumatyona ohava pangele nokuhondja omaludi eenghaku da yooloka momatala aNgwediva nelalakano opo vaha kale ve li momapandaanda tava longo oimbuluma ile okukala momaumbo vehe na eshi tava ningi.

Ova lombwela Kundana tava ti konima eshi va dopa ondodo onhi-12 ova ya kelelo lodoolopa yaNgwediva opo va ka pewe onhele momatala opo tava kala tava longele eenghaku. Ovati ohava futu ashike N$45 yoifendela yomatala komwedi keshe onghee ova pandula muni waNgwediva eshi a tula po oifendela yomatala i li pedu. “Otuna omukomo shaashi ovanhu ohava holoka momwaalu muhapu tava eta eenghaku davo di pangelwe nokuhondjwa. Onghee eshi ohashi tupe omukumo opo tu longo nondjungu noshoyo okukala atu ya kula nawa oshiwana,” Heita ta ti.

Heita okwa ti oshimaliwa osho hava mono meenghaku ohava futu mo onduda yavo yokuhiila, okukwafela ovadali vavo noshoyo okulanda oikulya meumbo.

Okwa yelifa ta ti ove li honga voo vena okuhondja eenghaku noshoyo okukala tava tale ouvidilo komalungula kombinga nghee ovanhu hava hondjo nokupangela eenghaku.

 

Sheyanale okwa ti okamaliwa aka hava mono mongeshefa yavo oshi dulife eshi ngeno ve li meumbo va nagala vehe na eshi tava ningi.

“Otwa hala okutwa omukumo ovanyasha vakwetu ava ve li momaumbo vehe na eshi tava ningi va telela ashike okupewa omakwafo kovadali vavo,” Sheyanale ta ti.

Okwa weda po ta ti ina va panda eshi ovanyasha vepupi lavo hava kala tava longele ovanhu ominyonena okunyeka ko omaliko avo noshoyo okudipaa nokukwata ovanhu onghonga. Okwa kunghilila ovanyasha vakwao opo va xulife po okukala tava longo oimbuluma shaashi ka shina elao ngeenge omunhu ta kwena omahodi a nyekwa omaliko aye. “Otuna e halo yokuya kofikola ngaashi koipupudilo youngomba ashike ka tuna sha oshilimaliwa sha wana. Onghee ohatu indile kwau e na e halo oku tu yambidida etu sha keneke ondjilakati opo tuye kofikola,” Sheyanale ta ti.

Ova weda po tava ti ova taalela omashongo ngaashi ovanhu vamwe vehe hole okufutu ondado ina i li xwapo noshoyo ovanhu vamwe ve hole okukwata efimbo lile oku ka tala ko eenghaku davo ngeenge da pwa okulongwa.

Ova ti ove li longekida okukala va ya kula oshiwana nawa efimbo keshe onghee ku keshe ou e na e halo lokutwala eenghaku daye di ka longwe na talele po omatala aaNgwediva Omaandaxa fiyo Olomakaya okudja ongula fiyo okomatango.

fhmalwa@nepc.com.na


2022-09-19  Festus Hamalwa

Share on social media