Ovanambelewa vopolifi vavali, omukainhu nomulumenhu ova lopotwa va xulifa mexuliloshivike moWindhoek.

Omulumenhu weedula 36 okwa xulifila moshiponga shotuwa omanga omukainhu weedula 51 okwa fya eshi a lyatwa kotuwa pefimbo kwa li ta tauluka opate.

Oonakufya ova tongolwa ovo Ester Ileni Shatipamba naDennis Mwilima hava longele opolifi moWindhoek.

Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omupolifi womukainhu okwa xulifila ponhele opo a lyatelwa mondjila yo-B1 efimbo lokonguloshi.

Opolifi oya hokolola tai ti omulumenhu womupolifi vati otuwa yaye yopaumwene oyo kwa li ta shingi oye lidenga mumwe notuwa oyo kwa li tai di komesho.

Oshiningwanima eshi osha ningwa efimbo loufiku lwopotundi 23h00 kolukanda Otjomuise.

Nakufya vati okwa twalwa koshipangelo shopaumwene shoMedi Clinic fiyo ta xulifa shaashi okwa li a mona oshiponga neenghono.

Opolifi oya ti omushingi wotuwa ikwao weedula 34 okwa mona oshiponga komutwe nokomaulu, nokwa twalwa koshipangelo opo a ka mone epango lopaunamiti.

Ovakwapata vavo ova shivifilwa nomakonakono opolifi otaa twikile. fhamalwa@nepc.com.na