• September 18th, 2018
Login / Register

Purojekiti yakuitekela mezi imwasimbwi mwa Katima


Katima Mulilo – Bukamuso bwa purojekiti yakuitekela mezi ili yene bonahala kuba yakukayekwa bayahi batolopo ya Katima Mulilo ki katengo katolopo habuzibwi, kasamulaho mubusisi wa sikiliti sa Zambezi Lawrence Sampofu nalaezi katengo katolopo kuli kabone kuli bayahi batolopo bakena mwatumelelano. Kemiso ibonahala kuli netile kasamulaho bayahi batolopo bakala kufumbela muzamaisi wa tolopo Raphael Liswaniso, mi mane kuti babañwi nebafumbela “kumuomba moyo.”

Katengo katolopo kabulela kuli nekabata kutisa kalulo yakuitekela mezi mwakweli ya Lungu, kuli “bafumane hande mali nikuli batu bano lifiswa kusina sobozi, ili taba yene kafukuza lipilaelo zasicaba nikubona kuli balifa kabunako.

Kono buiketelo bo nebuhanilwe kisicaba bane basikatabiswa kitaba yakuli nebana nikulifela ma mita amezi N$2500. Purojekiti yeo ne etelezwi kikampani yanaha China yezibahala ka ABC. Bayahi batolopo nebana nimaikuto akuli katengo katolopo nekabata feela ku anya batu babashebile, nebabulela kuli mamita amezi natula hahulu kakuli kwamulaho nebalifa feela N$450. Bayahi batolopo nebakile bacaula kabuñata habeli mone kuna nimifumbo yamafu ili taba yene hapelelize mubusisi kuyemisa purojekiti. Kono kasamulaho walikweli zepeli kuzwelela purojekiti haiyemiswa hakuzibahali hande kana ikazwelapili kapa awa. Hana kupilwe kubulela falitaba zeo muzamaisi wakatengo katolopo nakashelize lipuzo kaufela kumubusisi.

Hana sundilwe kuli abulele kana purojekiti ikazwelapili kapa awa, Liswaniso naize purojekiti neyemisizwe bkeñisa kuli kuna nilikelezo zene filwe kikatengo ka NSI ni mubusisi zeswanela kulatelelwa. Kono nasatabeli kutoloka kuli likelezo zeo neli zecwañi. Mutende omuñwi wa viki neukile wabiha mwakweli ya Mbuwana kuli katengo ka NSI nekalaezi katengo katolopo, kuyemisa purojekiti yakubeya mamita akuitekela mezi, kakuli mayemo ateñi nasikanyatelwa. Liswaniso nahatelezi kuli “purojekiti nesikayemiswa, kono nelilimanisizwe feela, ili kuli lutaleleze likelezo za NSI.” Sampofu naize lika lizamaya hande mi mikopano nisicaba ise itatekile. Nasikatoloka kana kukafumaneha tatululo kapili.

Mamita akuitekela mezi nabeilwe mwabuñata bwa likomponi, kwanda amwa Choto ni Cowboy ili teñi bayahi balikomponi nebasabisa kuli bakanata babeleki bakatengo katolopo nikampani ya ABC, haiba inge batundamena kubahapeleza ku amuhela mamita. Kalulo yakuitekela mezi ise ilumbilwe kibabaiselisa kakuli ibalumelela kusikulula mobaseliseza mezi, mi lipilaelo zakuli bababala mamita baipeela linombolo lisili lise lilibezwi. Bayahi batolopo nebaswanela kulifa N$2500 mwalikweli zetalu, ili kone kuekelizwe kuisa mwalikweli zesilezi, kono litifo kaufela liyemisizwe kufitela hakukazibiswa.


2018-08-20 09:33:08 29 days ago
Share on social media

Be the first to post a comment...

You might also like...