Festus Hamalwa
Omulumenhu weedula 49 okwa tambulilwa moshipangelo shaShakati e li monghalo itai nuwa omweva konima eshi vati a dengwa nokutuwa neembele kovakwashiwana molwaashi a ponokela nokunyeka omulumenhu mukwao ongodi yopeke.
Kakele kokunyeka ko ongodi yovanhu, omulumenhu oo edina laye li shivike kuKundana, vati okwa twa yoo oshihakanwa shaye neembele oikando ya yooloka noku mu denga nomamanya.
Oshiningwanima eshi osha ningilwa molukanda Uupindi mOshakati efimbo loufiku Omaandaxa.
Nakuninga oshihakanwa Kefas Nghishikushitya (39), ou kwa li ta nyekwa omaliko aye komufekelwa naye okwa tambulilwa moshipangelo shaShakati
Omukulunhu wopolifi moshitukulwa shaShana, Commissioner Naftal Sakaria okwa hokolola ta ti omulumenhu oo edina laye itali dulu okutumbulwa shaashi ina holoka natango momhangu, okwa dengwa kengungo lovanhu konima eshi a nyeka ko ongodi, nokutwa Nghishikushitya neembele.
Sakaria okwa koleka kutya ovakwashiwana ovo va mona oshinima osho ova ponokela omufekelwa ndele tave mu denge nomamanya noku mu monifa oshiponga neenghono. Pefimbo Kundana a talela po omufekelwa moshipangelo shaShakati, okwe lipopila ta ti okwa hangika ta di koilonga komatala mOshakati eshi a hanga ovanhu tava tataa ombudi oyo ya twa Nghishikushitya neembele. “Okudja opo ovakwashiwana ova nukila nge nokudenga nge tava ti kutya aame nda nyeka ko ongodi yaNghishikushitya,” ta hokolola.
Okwa ti ota ka patululila ovakwashiwana ovo ve mu denga oshibofa molwaashi okwa monifwa oshiponga ehe na ondjo.
Lwopokati opo, nakuninga oshihakanwa Nghishikushitya okwa koleka ta ti okwa ponokelwa nokutuwa neembele komulumenhu oo e li omufekelwa.
“Onda hangika handi di koilonga efimbo lokonguloshi, okwa nukila nge tete nokudenga nge neengonyo nokonima okwa kufa ombele nokutwa nge,” Nghishikushitya ta hokolola.
Okwa ti okudja opo okwa ingida fiyo ovakwashiwana tave uya oku mu yambididda nokuponokela omufekelwa.
“Naame okwa li ndi na ombele ashike inandi i kufa mo shaashi inandi hala oku mu monifa oshiponga. Onghee onde liyandja ashike fiyo ta longele omunyonyena,” ta ti.
Okwa kumaida oshiwana opo shi kotoke ngeenge tashi ende oufiku unene tuu momalukanda molwaashi ookalyamupombo ove hole okuteta ovanhu keendjila ngeenge tava di koilonga.