Festus Hamalwa
Omupeduminista mouministeli wehongo Faustina Caley okwa ti ngeno kapa li NAMCOL ngeno ovanhu vahapu inave shi pondola okuya koipupudilo yopombada ya yooloka.
Edi Caley okwe di popya koshiindingili shokudjala omanguwo sha li ko oshivike sha dja ko koshitai shaNAMCOL mOngwediva. Ovanafikola 280 va dja moshitai shaNAMCOL mOngwediva ova pewa eedjapo momaifano a yooloka.
Eshi a li ta popifa oonakudjala omanguwo Caley okwa ti okudja momudo 1997 NAMCOL okwa dana onghandangala yakula mokuyandja eemhito kovanafikola va dopa ondodo 10 nondodo 12 opo va xwexwepaleke oilongwa yavo.
“NAMCOL oshipupudilo sha fimana molwaashi osha lundulula eenghalamwenyo dovanafikola vahapu unene tuu ovo va pita oilongwa yavo okupitila mopologalama yaNAMCOL,” ta ti.
Ovanafikola 487 otava ka djala omanguwo avo koshipupudilo shaNAMCOL moWindhoek momafiku 27 omwedi ou.
Caley okwa ti ope na ovanhu vahapu va ninga ovanashilonga va yooloka va pita okupitila moNAMCOL omanga vamwe ova ninga ovanangeshefa.
“Ouministeli wehongo otau twikile okuyambidida NAMCOL opo a kale e na oikwafifo ya wana yokulongifwa kovanafikola,” ta ti.
Moshipopiwa shaye omukulunhuwiliki woNAMCOL Heroldt Murangi okwa ti Namcol ota twikile noku yandja ehongo longushu kovanafikola.
Murangi okwa weda po ta ti elalakano loNAMCOL okulwifa ondjala noluhepo nosho yo okudeula ovanafikola va ka ninge ovanashilonga va yooloka.