Ngaashi naanaa kwa didilikwa kutya moshitukulwa shaMusati omwa mbombolokela Ovaangola ve li 1 163, ovanhu ovo onghee ngaho tava pumbwa oikulya.
Ovaangola ava mopaife ngaha ova ngudumana pEtunda opo paife hava di.
Omunashipundi welelo lopashitukulwa mOmusati Andreas Shintama ota indile oshiwana opo shi yandje ekwafo keenhauki edi ngaashi oikulya, oikutu, noikumbafa nosho tuu.
Shintama okwa ti ombelewa yaye oya yakula omakwafo oikulya ngaashi oukutu voufila neeshi deendooxa da dja moshiwana. Okwa ti nombelewa yomuprima nayo oya yandjele ngaa oikulya kwa li.
“Nonande Ovaangola ava kwa li va pewa oikulya onghee ngaa natango andi pula Ovasamaria opo va yambidide oshiwana shAangola eshi shaashi oshi li momhumbwe yakula yoikulya noikumbafa,” Shintama ta ti. Kansela okwa ti Ovaangola okwa li ve li keenhele da yooloka moikandjohoololo yomoshitukulwa shaMusati, ashike paife aveshe ova ngudumana ponhele imwe pEtunda.
“Oshiwana nashikwatafane neembelewa dookansela, nomalelo opamifyuululwakalo ile nombelewa yangoloneya yoshitukulwa ngeenge shi na sha eshi sha hala okuyandja keenhauki edi,” Shintama ta ti.
Okwa hokolola kutya omwaalu onghee tau enda wa uka pombada efiku nefiku moshitukulwa shaMusati. Yee ta yelifa ta ti oshiwana shAangola eshi osha pumbwa oikulya ya wana, onghee oikulya ngaashi oukutu woufila ova pumbiwa vahapu opo va shiive okuwanena eenhauki.
Shintama okwa pandula oshiwana eshi tashi twikile nokuyambidida eenhauki edi.
“Ohandi kunghulile oshiwana opo shi kale shi na ombili nelongelokumwe nOvaangola ava,” Shintama ta ti.