WINDOKO – Mafelo aviki amukiti wapaseka nasika ikela feela kusina likozi zafamukwakwa, mi balobapeli nebalatehezwi kibupilo bwabona. Kanako yeswana ñohola batu baketalizoho nebabihilwe kuli nebatimezi mwanaha kaufela. Sibuabui wasipokola sanaha, Mutatubi Yomuhulu Kauna Shikwambi, naize piho yalinombolo kuzwelela kwakampani yebona zalikolofalo zafamukwakwa (MVA) isupeza kuli likozi zafamukwakwa likutezi fafasi ka 35 pesenti hakubapanywa ninako yeswana ñohola. Piho ibonisa hape kuli hakubapanywa ni silimo sa 2018 kanako yeswana, likolofalo neliekelize ka pesenti iliñwi, mi mafu naekelize ka 60 pesenti. Hala likozi zene balilwe kuzwa Labutanu kutisa Lamubulo neli hala libima zemashumi asilezi kuzwa mwa Otjiwarongo ili kwa Erindi Omaue Labutanu.
Mukwaezi walilimo zemashumi amane kaze lobañwi, yanakwaeza motikala yamufuta wa Toyota double cab, nalatehezwi kikamaiso yamotikala mi sepindumuka. Nekuna nibatu basilezi mwateñi, babahulu bababeli nibanana babane, Kuakalezwa kuli motikala haipindumuka nikutuka mulilo, yomuhulu alimuñwi nibanana babane nebapulusizwe mi alimuñwi nacezi mwateñi, mi nazibahalizwe kuba Titus Makili walilimo ze 51. Kozi yabubeli nebihilwe mwa Ongwediva Lamukibelo, kasamulaho mukwaezi wamotikala yamufuta wa Toyota V6 double cab, yamubala wasilivera, nalatehezwi kikamaiso yamotikala, mwamukwakwa wacebwecebwe wa Onamutayi Adolf mabapa nituntolo twa Onamutayi.
Mapokola nebaize nelongile batu basilezi kungelela nimukwaezi, bababeli nebatimezi onafo feela mi babalalu nebaholofezi. Bane batimezi nebazibahalizwe kuba Olavi Nambwanga walilimo zepeli, (ili mwana mukwaezi) ni Theresia Alfeus, walilimo ze 31 (ili musala mukwaezi). Mapokola mwa Usakosi Lasunda nebabihile kozi mone kukwezi mutu alimuñwi ili yana shwile. Kuakalezwa kuli mwahala busihu bwa Lapelekelo ni Lasunda kakusasa, yanakwaeza motikala yamufuta wa Toyota sedan anosi, William Duncan McNab walilimo ze 44, nakwaeza kuzwa kwa Usakos halatehelwa kamaiso yamotikala mi yapindumuka. Nashwezi onafo. Kozi nelemuhilwe habusa kibatu bane bafita.