Hilma Nakanduungile
EENHANA-Ohamba yOukwanyama meekulu Martha Mwadinomho yaKristian Nelumbu okwi indile oshigwana shi simaneke nokukaleka po omithigululwakalo, oshoka uuna dhaa po, oshigwana kashi na mpoka tashi yi.
Moshipopiwa sha leshwa pehala lye komugandjimayele gwe Mandume Pohamba, pethimbo lyoshituthi shomithigululwakalo shopashikandjohogololo Eenhana, sha dhanenwa poskola Onankali North oshiwike sha piti, Nelumbu okwa ti okwa ndhindhilika kutya aawiliki yopamuthigululwakalo moshitunda she itaya kwatele po omithigululwakalo ngaashi ye na okushininga, onkene a dhimbulutha oshigwana kutya uuna sha dopa okusimaneka nokukaleka po omithigululwakalo, kashi na mpoka tashi yi.
Ta holola ngeyi kutya aawiliki yopamuthigululwakalo oyi ikwatelela unene kiinima yoshingolo, mbyoka tayi kanithitha omithigululwakalo nokudhi kaleka dhaa na ongushu.
“One omu na oshinakugwanithwa oshinene shokuwilika aantu momikunda ya kale ya dhiginina omithigululwakalo, opo aanona nayo ya landule mo.
Aavali naatekuli oye li monomola ontiyali okukwashilipaleka kutya aanona momagumbo oya longwa omithigululwakalo,” Nelumbu ta ti ngaaka.
Okwa ganda wo yamwe po yomaakwashigwana mboka ye na euveko lyopombambo kutya kehe shimwe oshi li oshinakugwanithwa shoskola.
“Iinima yopamuthigululwakalo kayi shi iinima yoskola, ihe iinima yetweni lelalela aavali, aatekuli yaanona naawiliki yopamuthigululwakalo, opo tu yi kwatele po.
Omithigululwakalo ngele itatu dhi kalekii po, katu na mpa tatu yi. Natu dhi tuleni miilonga ngaashi dhi li, onkene tu kutheni oshinakugwanithwa ngaashi twe shi inekelelwa kaakwashigwana tu kale aawiliki yopamuthigululwakalo opo tu dhi kaleke po,” Nelumbu ta kumagidha ngaaka.
Okwa tsikile ta indile aavali ya tume aanona koskola nokuya tsa omukumo ya dhiginine elongo.
Ta gwedha ko ta ti momuthigululwakalo omu na iinima oyindji mbyoka ya pumbwa okutulwa pamuthika gwoshinanena kuyo, naashika otaye shi tompola ashike uuna ya longwa. Nelumbu ota ti oshisithahoni uuna aanona taya nyengwa okupopya omalaka goohe nooyina, omanga taya thamuna nawa omalaka galwe.
“Tu kaleni twa longwa, ihe natu dhiginine elaka lyetu. Nali kale lyotango. Oshihwepo okuyolwa molwashoka to teya Oshiingilisa, ashike oshiwinayi uuna to yolwa molwasho to teya Oshindonga nenge Oshikwanyama, shoka wa yama. Naku dhigininwe elaka, oshoka olyo oshinima oshinene. Elaka lyoye olyo oshinima oshinene, molwashoka olyo ashike oshinima tashi ukitha omuthigululwakalo goye nawa. Ngele elaka lyoye owe li dhini, nena omuthigululwakalo gwoye aguhe owe gu dhina,” Nelumbu ta kunkilile ngaaka.
A popi pehala lyOmukwaniilwa gwaNdonga Fillem Shuumbwa Nangolo poshituthi shino, tatekulu Naemani Hamalwa okwa ti omithigululwakalo odha simana noonkondo, molwashoka odho hadhi yoolola aantu kutya oyo oolye, dho odho wo elandulathano ndyoka hali ya wilike nkene ye na okwiihumbata.
Hamalwa ta gwedha ko kutya oshituthi shokutyapula omithigululwakalo oshi na ongushu noonkondo, molwashoka otashi gandja elongo enene komapipi ga yoolokathana. Ta indile aadhaninkandangala ayehe melongekidho lyiituthi yoludhi nduka ya pule komeho.
Oshituthi shika osha li she eta pamwe aantu ye vule 700, mwa kwatelwa oongundu ndhoka dha kutha ombinga muudhano, moka wo aasindani ya li ya pewa omapapa.