Omuhiki gwoongalo dhopambepo Sovita Joshua, ota andjaneke omagadhi gwokugamena aanuulema yoshipa koonte dhetango.
Joshua okwa ti omagadhi ngoka ogokukeelela oshipa kaashi pye  unene koonte dhetango, oshowo okukeelela natango omikithi ngaashi okaankela.

“Omagadhi ngaka ohandi ga gandja oshali shamuhongi, itaga landithwa. Otandi kumagidha  kehe ngoka ta ka mona ompito yokupewa, kaha ka landithe omagadhi ngaka,” Joshua a popi ngaaka.

Ta ti, oku na elelakano lyokwaandjaneka omagadhi ku kehe gumwe e na oshipa oshitokele moshilongo ashihe.
“Omagadhi  onde ga gandja pomahala ogendji miitopolwa ayihe moshilongo, kehe ngoka inaa mona, na kambadhale okuya mekwatathano lyopangodhi naJoshua, opo e mu pukulule mpoka e na okuga adha,” ta ti ngaaka.
Joshua ta ti, okwa ndhindhilike kutya aantu ye na uulema woshipa oshitokele, ohaya mono iihuna. Oyendji iipa yawo oya yonuka komutenya.

“Oyendji ya thiki pungame,  oya shololitha omwenyo gwandje. Aantu yoshipa sha fa shandje oya mona iihuna, oyendji oya papata iilalo  oshoka itaya sile iipa yawo oshimpwiyu,” ta popi newi lyohenda.
Ta kumagidha aantu ayehe yoshipa oshitokele ta ti, naya simaneke omalutu ga wo, naya shonopaleke ethimbo lyokukala momutenya yo taya zala iikutu yasiikila omalutu ga wo.

Joshua okwa ti, oha gandja omagadhi paali. Ta ti, okandini kamwe komagadhi ohaka kwata omwedhi gumwe, ka pwe po.
Ta ti, ngoka amona ompito yokupewa omagadhi, nega longithe ngaashi gena okulongithwa, inaya longitha uulingilingi, opo ya thigile po yakwawo mboka inaaya mona.

Joshua okwa kwashilipaleke kutya, omagadhi ngoka ohaga kwathele nawa, una taga longithwa palandulathano.
Ta ti, okwe ya po nedhilaadhilo ndyoka konima, a li a ningwa omukomeho mehangano lyokutopolela aantu yoshipa oshitokele omagadhi ngoka.
Joshua ta ti, kehe ngoka inaa mona natango na dhenge konomola ye yopeke 0812378760.

“Onda li ndashanga okatumwalaka okahupi kepandja lyandje lyoFacebook opo lyitaambathanwe kaalanduli yandje, komalungula , opo kehe gumwe ena oshipa shoka atseyithilwe,” Joshua  a popi ngaaka.