Omukulunhu wehangano Kwafela Oshiwana Foundatio Paulus Kornelius ota indile moshiwana opo shiyambidide omukainhu Bernadette Kanambungu a pumbwa ekwafo loshimaliwa opo a ka lande eshina lokufudifa.

Kornelius okwa ti omukainhu ou okwa li a kwatwa kombuto yoCovid-19, omo paife ta ku hokololwa kutya okuli moshipangelo natango.

Okwa ti Kanambungu okuna ouppyakadi womapunga aye a fya paife, onghee iha dulu vali okufuda nawa shaashi omapunga okwa fya.

Mopaife ngaha Kanambungu okwa pumba okulekelwa moshipangelo shaashi okwa veluka ombuto yoCovid-19, ashike okuli momhumbwe yoshimaliwa eshi a pumbwa opo a ka lande eshina lokufudifa lina N$14 000.

Pefimbo Kornelius a ninga eenghundafana naKundana okwa hokolola ta ti omukainhu ou okuli moupyakadi shaashi okwa pumbwa opo a kale a landelwa eshina lokufudifa tete opo manga ina ya keumbo laye.

Okwa ti ngeenge Kanambungu okwa kala ena eshina lokufudifa nena eshi otashi kemukwafela neenghono okukala ta fuda noupu.

“Ehangano letu olina olukeno noshiwana eshi shi li momhumbwe onghee otwa hala okukala twa yambidida Kanambungu opo a kale a mona eshina laye lokumukwafela okufuda,” Kronelius ta ti.

Okwa ti ku ku keshe ou ena ehalo lokuyambidida Kanambungu na kwatafane konomola yongodi yaye 0812042231 efimbo keshe.

“Oshiwana otwa pumbwa okuyambididafana shaashi osha fimana okukwafela ovanhu veli moupyakadi, onghee keshe omunhu okwa manguluka opo a kale etu waimina opo tu kwafele Kanambungu,” Kornelius ta ti.

Okwa yelifa ta ti ehangano Kwafela Oshiwana Foundation otali lalakanene oku kwafela oshiwana moshilongo ashishe.