Ovakainhu vatano, mwa kwatelwa omukwashiwana waAngola ova futifwa kuNAMRA oN$32 000, onga ehandukilo eshi va hangika noinima oyo ina i pitikilwa moNamibia.

Opolifi moshitukulwa shaMusati mEtitano oya kwata ko omalodu oWhiskey, oipakete yoikutu, omakende oomadi noipakete yomakaya a dja koAngola, konima eshi ya lopotelwa komukwashiwana umwe.

Oinima oyo i li pongushu yoN$77200 oya hangika mobesa mOutapi, noya hangwa ya yukifwa ngeno koWalvis Bay

Komufala wopolifi moshitukulwa shaMusati Commissioner Ismael Basson okwa kolela ta ti ovafekelwa ova twalwa kovanambelewa hava ungaunga noinima ngeenge tai etwa moshilongo ile tai twalwa kondje yoshilongo voNAMRA opo va ka ngilwe omapulapolo.

Basson okwa weda po ta ti oinima okwa li ya nunimwa i kala ndifwe koWalvis Bay.

Okwa kumaida oshiwana opo shi twikile nokulopotela opolifi kombinga yovanhu tava landifa oinima oyo ina i pikilwa mo moshilongo.

Okwa weda po ta ti oshiwana nashi li kale ke kokule noinima ina i pitikwa moshilongo shaashi osha nyika oshiponga ngeenge omunhu a kwatwa noinima noha shi eta omunhu a pewa ehandukilo lopaveta. fhamalwa@nepc.com.na