Kansela woshikandjohoololo shEenhana Olivia Tuyenikelao Hanghuwo pamwe namwene womukunda Omahenge Fransa Mutota ova yambidida omukulupe weedula 105 konima eshi eumbo laye la pya po.

Eumbo lomukulupe Hileni Nekwaya ola pya po omwedi ou omafiku 07, eshi a pilwa eenduda daye dokepata ngaashi elimba, onduda yoshakalwa nokatala kokuuhala. 

Omukulupe ou meumbo laye inamu xupa sha
oikulya shaashi oikulya aishe oya pila meenduda.

Eenduda oda xwikwa po kokatekulu komukulupe eshi kwa li taka danene omundilo efimbo lomutenya omanga inakulu kwa li a kofa monduda yoshakalwa. 

Meumbo inamu hangika omunyasha efimbo olo omundilo wa tameka, ashike mushiinda womukulupe okwa mona omundilo wa tema, nokulotokela meumbo lomukulupe. Omulumenhu eshi a fika meumbo okwa hanga ashike omukulupe a nangala, onghee okwa endelela opo a kokolole mo omukulupe monduda omu kwa li e li ya tema. Elao linene kape na omunhu a kanifa omwenyo ile a mona oshiponga kolutu.

Meenghundafana a ninga naKundana kansela Hanghuwo okwa hokolola ta ti ombelewa yaye eshi ya lopotelwa eumbo lomukulupe la pya, onghee oya kufa etokolo opo i kale ya landela omukulupe oikulya ngaashi ekutu loufila, oshivelelwa, oikutu youtalala, eenghaku, omatanga okulya netalashe lokunangala. 

Okwa yelifa ta ti oinima ei a yandja komukulupe okwe i landa noshimaliwa sha dja mondjato yaye mwene shaashi oku na oshisho noshiwana nota lalakanene kutya ombelewa yaye oya kwafa ovanhu ava ve li moupyakadi.

Hanghuwo okwa li a enda pamwe namwene womukunda Omahenge ou naye a yandja eeshako doilya keumbo lomukulupe. Hanghuwo ota indile kovasamaria opo va yambidide omukulupe ou shaashi okwa pumbwa ekwafo loikulya noikutu natango.

Okwa ti oshiwana nashi kwatafane nombelewa yaye ngeenge shina omakwafo oku yandja komukulupe.