Moshikandjohoololo shaMundaungilo omwa didilikwa mu na omikunda dihapu dihe na omeva mayela fiyo opapa. Omundaungilo oshikandjohoololo shi li moshitukulwa shaHangwena, shimwe shomoikandjohoololo imwe ei i li keengamba daNamibia naAngola. Meenghundafana a ninga naKundana kansela woshikandjohoololo shaMundaungilo Festus Ikanda okwa hokolola ta ti oshikandjohoololo shaye osha taalela eshongo lakula lomeva unene tuu eshi omikunda dimwe dihe na omeva mayela.

Okwa ti omikunda 16 moshikandjohoololo shaye da kwatela mo Okavela, Oshihepo, Omufituwekuta, Oshikonda, nosho tuu odi li natango dihe na omeva a yela okunwa.

“Ovanhu ohava nu ashike meendungu, nomomifima, shili oshiwana oshi li moudjuu shaashi kasha na omeva a yela okunwa,” Ikanda ta ti. Ikanda okwa ti omhumbwe yomeva okwe i lopota koministeli yomeva, noministeli ei okwa li ya mona omhito opo i talele po omikunda edi. 

“Ouministeli wounamapya nomeva owa udaneka tau ka yandja oupomba vomeva momikunda edi di li momhumbwe yomeva a yela,” Ikanda ta ti. Kansela okwa hokolola yoo vali ta ti okwe shi pondola opo a ete po omalunduluko ahapu moshikandjohoololo shaye ngaashi eefikola konyala adishe odi na olusheno paife. Ikanda okwa twikila nokuhokolola omashongo ahapu aa e li moshikandjohoololo shaye ta ti: kamu na sha eepate, oshiwana otashi nyenyeta kombinga yomakwatafano, omatale okunwa oimuna noshoyo oupangelo inava wana.

Okwa ti moshikandjohoololo shaye omu na ashike oupangelo vatatu, onghee ovanhu vamwe ohava ende eendjila diledile tava ka konga ouhaku koupangelo vokokule ava ve li moshikandjohoololo shaMundaungilo.

Onghee ota indile kepangelo opo li va tungile ngeno oupangelo vavali opo va wanene oshiwana shiha ende vali eendjila diledile.

Pexulilo okwa pandula epangelo eshi la yambidida oshikandjohoololo shaye oku eta po omayakulo a pewa oshiwana.