Ovakwashiwana vomolukanda Benguela modoolopa Luderitz ova fiwa pomutenya konima eshi eebashu davo hetatu da pya po filufilu mexuliloshivike.

Ota ku hokolola kutya peebashu opo opa pila yoo vali etuwa nhatu odo vati da pya po filufilu da hangika da kanghamekwa momatala omudile e li popepi neebashu.

Omukonakoni woimbuluma moshitukulwa shaKaras omupedu Commissioner Nicodemus Mbango okwa koleka ta ti ka pe na omunhu a lopotwa a fila ile a monena oshiponga pefimbo eebashu ta dipi ashike omwa pila omaliko ovanhu ayeshe. Okwa hokolola ta ti fiyo opapa ka pe na ouyelele kombinga yoshietifi shomundilo onghee omakonakono opolifi otaa twikile.

Va ti oovene veebashu ova mona ashike eshi eebashu davo datema nokufaduka po. Oovene veebashu dimwe ohava hangika va ya nale koilonga.

Ota ku hokololwa kutya oonakupila omaliko kave na vali apa tava di omanga vamwe ova ninga eenghendabala doku dika eetenda, ashike kave na eshi tava li lilemo.

Opolilifi oya kumaida oshiwana opo shi li kaleke kokukule nokuteleka ngeenge sha kolwa noshoyo okukwashipaleke kutya oupalwa itava fiwa poluhayela unene tuu ngeenge meumbo muna ounona.

Umwe womukwashiwana okwa ti mobashu yaye omwa pila omambo nomidjalofikola dounona vaye onghee paife ounona vaye ova fiwa pomutenya shaashi kave na sha vali oikwafifo yofikola.

Okwa ti otai indile moshiwana opo shi va yambidide noikulya, oikumbafa nosho tuu oikwafifo ya yooloka.

fhamalwa@nepc.com.na