Windhoek- Movanona wokusika ko ntantatu valitjangesa vakare mevango lyosure momukunda gwaOtamanzi momukunda horowero gwaOmusati vatano nare vana dukamo mosure ngesi kuna karamu tupu vatatu mosure. Murugani gomomberewa zaPresidente gona goruha romakuliko unene efiro sinka vanona wokutunda momambo goruhepo Senia Endjala kayitente eyi nkera.
Endjala katente asi vatungimo womomukunda gwa Onkaankaa gwakara moOtamanzi kapi simpe vana kuzuvhako asi yinke mulyo gelirongo yipo nye asi vatungimo ngesi vahepa nye navenye kulikwata kumwe vatulisepo elikwamo lyokutara asi ngapi navagusapo udigu ou. Age kayitente eyi mvhura ezi kazipwire mokupitira momapuragero kumwe nosayitunga zaNew Era,kuhamena vanona ava vana kara asi momapata gahana asi eparu kwawapa. Age katjangwilire mukaro ogu asi kuna kara gokugusa nonkondo ndi mukumo. “Ame kwaruganesa yimaliwa yepangero nirande mudwaro gwawo gosure,nonguwo ntani kufuta yimaliva yawo yokosure nye apa nina kuhuyunga ngesi awo momambo tupu vana kara kuna kuvandavanda. Kapi vana hara kuza kosure ntani vakondi vawo nawo vana hafa mokumona vana vawo kapi vana kuza kosure,”yimo ana kutanta Endjala. Age simpe katente asi mukaro ogu guna pumbwa kulikwatesa kumwe ntani yipo asi turonge vakurona asi mulyo musinke guna karamu merongo komeho oko mukaro gukakare asi nokutarakosi.
Age katente asi pwakere siruwo simwe omu vazire vakadingure vakondi momambo gawo, kumwe nomugendesi erongo momukunda gwina Laban Shapange ntani kumwe nakansela gomukunda Johannes Iyambo momukatulisa yigongi nokukagava mapukururo nye kuna kumoneka asi yitundwamo yahana udumba.”Mumati ogu kakere asi yige ana kugendesa mapongo getu konyima tupu zosigongi age makura yipo vamuhomokerere mbunga zimutoone dogoro kosipangero sepangero moOshakati, asi morwa yige gazigidire sigendo esi sikatulise mapongo gangesi, eyi yakere asi kapisi usili,”age kafatwilire eyi nomutjima gokulisigo nesa. Age katente asi eyi ava mono pomukunda asi mulyo unene ntani yelike vana hara nayihorokapo pomuknda kuna kara tupu kumwa marovhu. “Nsene oza pomukunda gwina povili zo 05h00 hawe tokagwana vantu ava pomanwino nare vana kara. Aw okapi ava rugana, awo kundindira tupu epangero livape nondja makura. Nampili ngomu yakara asi poveli vana pumbwa nondja, sinzi sovantu vakarapo vadinkantu vana kara asi kuvhura varuagane moomu ava rugana vadinkantu vakwawo.
Age simpe kunalituramo mokuza kumwe nakansela vakatare asi yinke navavhura kurugana, yipo asi vavape mukumo varugane pwavene, unene varugane momapya gawo valime mahangu morwa pevango olyo vatunga evhu lyapo ewa hena unene. Age simpe kageve mukaro gwendi gokupira kuhafere nampili woowo vana kutambura yimaliwa yovanona woruhepo kapi ava yiruganesa kositambo sayo, awo kuyiruganesa koyikorwesa makura.